Soltústik Qazaqstanda «Botaı. Ǵaıyp ǵalam» tarıhı jobasynyń túsirilimi qalaı ótip jatyr
ASTANA. KAZINFORM - Soltústik Qazaqstan oblysynda «Botaı. Ǵaıyp ǵalam» kórkem-shytyrman fılminiń túsirilim jumystary bastaldy, dep habarlaıdy Ulttyq kınony qoldaý memlekettik ortalyǵynyń baspasóz qyzmeti.
Joba Qazaqstan Respýblıkasy Mádenıet jáne aqparat mınıstrliginiń tapsyrysy boıynsha, Ulttyq kınony qoldaý memlekettik ortalyǵynyń qoldaýymen jáne Soltústik Qazaqstan oblysy ákimdiginiń qatysýymen júzege asyrylyp jatyr. Jobanyń basty maqsaty – óńirdiń tarıhı-mádenı murasyn nasıhattaý.
Fılmniń alǵashqy túsirilim kúnine oblys ákimdigi, Kıno ortalyǵy, kreatıvti ındýstrııa ókilderi men túsirilim toby qatysty.
- Biz ulttyq kıno shejiresindegi tarıhı kezeńniń kýási bolyp otyrmyz. Elimizde tuńǵysh ret kóne Botaı mádenıetine arnalǵan kórkem fılmniń túsirilimi bastaldy. Joba Memleket basshysynyń tól tarıhymyzdy zerdeleý, ónerimiz ben mádenıetimizdi órkendetý jónindegi tapsyrmasy aıasynda júzege asyrylyp jatyr. Túsirilim jumystary Soltústik Qazaqstan oblysyndaǵy biregeı Botaı qonysy aýmaǵynda jáne onyń mańyndaǵy tarıhı-arheologııalyq aımaqta ótedi. Dál osy óńirde alty myń jyl buryn adamzat tarıhyndaǵy mańyzdy oqıǵa – jylqyny qolǵa úıretý úderisi júzege asqan. Memlekettik qoldaý aıasynda júzege asyrylyp otyrǵan bul joba ejelgi órkenıettiń tereń tamyryn jańǵyrtyp, Soltústik Qazaqstannyń baı murasyna degen qyzyǵýshylyqty arttyra túsedi, - atap ótti Ulttyq kınony qoldaý memlekettik ortalyǵynyń Basqarma tóraǵasy Qurmanbek Jumaǵalı.
Aımaq basshylyǵy atynan joba qatysýshylaryn túsirilim jumystarynyń bastalýymen oblys ákimdigi apparatynyń jetekshisi Rýslan Alıshev quttyqtap, kartınanyń Soltústik Qazaqstannyń ejelgi jáne biregeı murasyn nasıhattaýdaǵy rólin atap ótti.
-Bizdiń óńir úshin bul shynymen de mańyzdy ári máni zor joba. Ol tarıhymyzdy, mádenıetimizdi, tabıǵatymyz ben ólkemizdiń sulýlyǵyn kórsetip, onyń baılyǵyn keń aýdıtorııaǵa jetkizedi. Fılm tabysty bolyp, kórermenderdiń jyly qabyldaýyna ıe bolady dep senemin, — dedi ol.
Sonymen qatar, jańa fılmniń túsiriliminde Kıno ortalyǵy 2025 jyly uıymdastyrǵan respýblıkalyq «JARQYRA» kastınginiń jeńimpazdary qatysatyny aıtyldy. Kastıngke elimizdiń 19 qalasynan myńnan astam jas talant qatysyp, úzdikter Kıno ortalyǵynyń resmı akterlik bazasyna engizildi. Kastıng jeńimpazdary endi Ortalyqtyń jańa jobalaryna belsendi tartylyp, kásibı damý múmkindigine ıe bolady.
SQO-da túsiriletin Botaı mádenıetine arnalǵan kórkem fılm týraly jazǵan edik.
