Soltústik Qazaqstan joldarynda qansha qaýipti ýchaske bar
PETROPAVL. KAZINFORM — Soltústik Qazaqstan oblysy Shal aqyn aýdanynda, «Jezqazǵan-Petropavl» respýblıkalyq mańyzy bar avtojolda qar bógeıtin qorshaýlar ornatylyp jatyr.
«QazAvtoJol» ulttyq kompanııasy oblystyq fılıalynyń málimetinshe, jumys Baǵanaty eldi mekeni mańynda júrgizilip jatyr.
Jospar boıynsha 7,4 km qar ustaıtyn qorshaý ornatylýy tıis, onyń 6 km ornatyldy.
— Qar ustaıtyn ýchaskelerdi azaıtý maqsatynda tıisti jumys atqarylyp jatyr. Qarasha aıynyń ortasyna deıin aıaqtalady. Temirbeton qorshaýlar qoıylyp jatyr. Osy maqsatqa 526 mln teńge bólingen. Jalpy respýblıkalyq mańyzy bar joldarda qysta qaýipti jalpy uzyndyǵy 58 km bolatyn 31 ýchaske bar. Bul joldardyń 6,1 shaqyrymynda — aǵash, 8 shaqyrymynda — temirbeton qar ustaıtyn qorshaý bar, — deıdi fılıal dırektorynyń orynbasary Qanat Óserbaev.
SQO-da respýblıkalyq mańyzy bar joldardyń jalpy uzyndyǵy — 2 myń km shamasynda. Avtojoldardy kútip ustaýmen «QAJservıs» JShS aınalysady.
Onyń quramynda 6 jol-paıdalaný basqarmasy jáne 11 jol-paıdalaný pýnkti jumys isteıdi, 300-ge jýyq jumysshy bar.
— Qys maýsymyna daıyndyq aıasynda birqatar jumys atqaryldy: shuńqyrlar tegisteldi, butalar shabyldy, jol jıegi orylady. Sonymen qatar qysqy maýsymda qoldanylatyn 300-ge jýyq ýaqytsha jol belgileri, mysaly, «Taıǵaq jol», «Jyldamdyqty shekteý» jáne t. b. daıyndaldy. Qysqy kezeńde joldardy kútip ustaý úshin barlyǵy 152 tehnıka daıyndalǵan. Sonymen qatar, 26 tehnıka jalǵa alyndy. Byltyr tehnıkalyq park jańartylyp, 47 jańa tehnıka satyp alyndy. Onyń ishinde júk kólikteri, jol jóndeý stantsııalary, jeńil kólikter, manıpýlıator men avtogreıder bar, — deıdi Qanat Óserbaev.
Mamannyń aıtýynsha, qazirgi ýaqytta kóktaıǵaqqa qarsy materıaldar da tolyq daıyndalǵan.
Buǵan deıin SQO-da qysta jolda qalǵandarǵa arnalǵan 200-den astam jylytý pýnkti ashylatynyn jazǵan edik.
Al 18 qazanda óńirde alǵashqy qar jaýdy.