Soltústik Qazaqstan turǵyndary Prezıdentke joldaǵan hatynda ne jazdy

ASTANA. KAZINFORM — Prezıdent Qasym-Jomart Toqaevtyń atyna Soltústik Qazaqstan oblysy jurtshylyǵynan hat kelip tústi.

Soltústik Qazaqstan turǵyndary Prezıdentke joldaǵan hatynda ne jazdy
Foto: Aqorda

Hatta soltústikqazaqstandyqtar oblystaǵy taýarly sút fermalaryn salý tájirıbesin Memleket basshysynyń joǵary baǵalaǵanyna toqtalyp, muny aýyl eńbekkerleriniń mańdaı terine, iskerligine jáne týǵan jerge degen adaldyǵyna berilgen baǵa dep biledi.

Sondaı-aq Joldaýdaǵy Kókshetaý — Petropavl avtojolyn keńeıtý jónindegi sheshimdi de qýana qabyl alǵan. Turǵyndar bul bastama adam ómiri men qaýipsizdigin saqtaýǵa, Reseıdiń birqatar oblystarymen shektesetin óńir úshin tranzıttik áleýetti arttyrýǵa septigin tıgizedi dep esepteıdi.

Budan bólek, Soltústik Qazaqstan jurtshylyǵy «Halyqtyq qurylys» baǵdarlamasyna úlken úmit artady. Azamattar atalǵan joba áleýmettik ınfraqurylymdy odan ári ilgeriletýge, qurylys salasyn qoldaýǵa jáne jańa jumys oryndaryn ashýǵa múmkindik beretinine senimdi.

— Biz Qazaqstannyń jetistikterin maqtan tutamyz jáne Soltústik Qazaqstan oblysynyń ortaq iske qosyp otyrǵan úlesin joǵary baǵalaımyz. Siz aıqyndaǵan mindetterdi qoldaı otyryp, týǵan ólkemizdiń ıgiligi úshin eńbek etýge, el birligi men qoǵamdyq kelisimdi nyǵaıtýǵa, jas urpaqty otansúıgishtikke, adaldyqqa jáne eńbekqorlyqqa tárbıeleýge árdaıym daıynbyz, — delingen hatta.

Óńir halqynyń atynan hatqa Qudaıbergen Qalıev, Anatolıı Bashmakov, Gennadıı Zenchenko, Murat Qarajumanov, Eskendir Eleýsizov, Vladımır Býbenko, Serik Malaev, Erik Sultanov, Serik Bilálov, Raısa Polışýk sııaqty elimizge jáne óńirge belgili qoǵam qaıratkerleri, zııaly qaýym ókilderi men eńbek ardagerleri qol qoıǵan.