Soltústik Qazaqstan oblysyndaǵy iri sý qoımalary sý tasqynyna daıyn
ASTANA. KAZINFORM — Aldaǵy sý tasqyny kezeńine daıyndyq aıasynda «Qazsýshar» RMK-nyń Soltústik Qazaqstan oblysyndaǵy fılıaly Sergeev jáne Petropavl gıdrotoraptarynda josparlanǵan jóndeý jumystarynyń barlyǵyn aıaqtady.
Eki nysanda da jaǵalaýdy bekitý jumystary júrgizildi. Bıyl Sergeev jáne Petropavl gıdrotoraptaryndaǵy jóndeý jumystary aıasynda 7 is-sharany oryndaý josparlanǵan. Eki nysan da Soltústik Qazaqstan oblysy Tótenshe jaǵdaılar departamentiniń habarlandyrý júıesimen biriktirilgen jergilikti eskertý júıelerimen jabdyqtalǵan.
Sergeev gıdrotoraby Esil ózeniniń aǵynyn retteıtin negizgi nysan jáne Petropavl gıdrotorabymen kaskadta jumys isteıdi. Bul eki nysan Soltústik Qazaqstan oblysyn, sondaı-aq Qostanaı jáne Aqmola oblystaryn ishinara sýmen qamtamasyz etetin biryńǵaı sý sharýashylyǵy keshenin quraıdy.
– Avarııalyq kezekshi brıgadalar quryldy, mamandar qajetti jabdyqtarmen jáne qural-saımandarmen qamtamasyz etildi. Ýchaskelerdegi qyzmetkerlerge qaýipsizdik tehnıkasy boıynsha nusqaýlyq ótkizildi. Sý qoımalarynyń tolý deńgeıin táýlik boıy baqylaý jáne sý tasqyny jaǵdaıy týraly aqparatty múddeli memlekettik organdarǵa, sondaı-aq Reseı Federatsııasyndaǵy áriptesterge jetkizý úshin jedel shtabtyń jumysy uıymdastyryldy, – dedi «Qazsýshar» RMK-nyń Soltústik Qazaqstan oblysyndaǵy fılıal dırektory Erjan Kýsýmbaev.
Eske sala ketıeik, vıtse-mınıstr sý tasqyny boıynsha naqty boljam 1 naýryzda daıyn bolatynyn aıtqan edi.