Soltústik Qazaqstan oblysynda janarmaı qory eki aılyq normadan asady

ASTANA. KAZINFORM – Soltústik Qazaqstan oblysy janarmaımen tolyq qamtamasyz etilgen. Qazirgi ýaqytta óńirdiń benzın qory eki aıdan astam merzimge jetkilikti, al suıytylǵan munaı gazy boıynsha qosymsha kólem bólindi.

Bul derekti Energetıka mınıstrliginiń resmı ókili - mınıstrdiń keńesshisi Ásel Serikpaeva taratty. Ol birqatar buqaralyq aqparat quraldarynda jarııalanǵan «SQO-da benzın tapshylyǵy baıqalýda» degen málimet shyndyqqa sáıkes kelmeıtinin málimdedi.

- Energetıka mınıstrligi óńirdiń janarmaımen tolyq qamtylǵandyǵyn habarlaıdy: AI-92 markaly benzın qory 24,95 myń tonnany quraıdy, bul 67 kúndik qajettilikti qamtamasyz etedi.

Energetıka mınıstrligi tarapynan óńirdiń munaı bazalaryna kelisimshart boıynsha josparlanǵan barlyq kólem tolyq jetkizildi. Al munaı bazalarynan avtojanarmaı quıý stantsııalaryna deıingi ýaqytyly tasymaldaýdy uıymdastyrý jáne AJQS-tardaǵy benzınniń bar-joǵyna baqylaý júrgizý Soltústik Qazaqstan oblysy ákimdigi janyndaǵy jedel shtabtyń quzyretinde, - dep túsindirdi Serikpaeva.

Onyń sózinshe, suıytylǵan munaı gazy boıynsha jetkizý kestesindegi ýaqytsha ózgerister Atyraý munaı óńdeý zaýytyndaǵy josparly jóndeý jumystaryna baılanysty boldy. Naryqty turaqtandyrý maqsatynda Energetıka mınıstrligi qosymsha 500 tonna ónim bóldi.

- Qarasha jáne jeltoqsan aılaryna arnalǵan jetkizý jospary maýsymdyq suranystyń artýyn eskere otyryp qalyptastyrylǵan. Atalǵan kezeńde óńirdiń qajettiligi tolyq qamtamasyz etiledi: qarasha aıynda — 4 800 tonna, jeltoqsan aıynda — 5 200 tonna resýrs jetkiziledi, - dedi mınıstrdiń keńesshisi.

Aıta keteıik, buǵan deıin SQO-da suıytylǵan gaz talonmen satylyp jatqany habarlanǵan bolatyn.