SQO-da zańsyz qaryz berý arqyly 1,8 mlrd teńge tabys tapqan kúdikti qamaýǵa alyndy
ASTANA. KAZINFORM — QMA Soltústik Qazaqstan oblysy boıynsha departamenti zańsyz kásipkerlik qyzmet, kúsh qoldaný arqyly óz betinshe áreket etý jáne alaıaqtyq faktileri boıynsha tergeýdi aıaqtady. Bul týraly agenttiktiń baspasóz qyzmeti málim etti.
2013 jyldan 2025 jylǵa deıin kúdikti tıisti lıtsenzııasyz jeke jáne zańdy tulǵalarǵa múlik kepildigimen paıyzǵa júıeli túrde qaryz berip kelgen. Mámilelerge zańdy sıpat berý úshin kelisimsharttarda naqty berilgen somadan edáýir joǵary soma kórsetilgen. Sebebi qujatta aldyn ala eseptelgen syıaqy qosylyp otyrǵan. Qaryzdar boıynsha aı saıynǵy syıaqy mólsheri qaryz somasynyń 5–10%-yn quraǵan, bul jyldyq eseppen 60–120%-ǵa teń. Sondaı-aq qaryzdy jasyrý jáne onyń qaıtarylýyn qamtamasyz etý maqsatynda múlikti satyp alý-satý týraly jalǵan sharttar rásimdelgen. Zańsyz qyzmetten túsken qylmystyq tabys 1,8 mlrd teńgeden asty.
— Kúdiktiniń áreketterinen azamattar zardap shekken. Jedel qarjylaı kómekke úmit artqan olar joǵary paıyzdyq mólsherlemeler men múlkinen aıyrylý qaýpine tap bolǵan. Kúdikti qaryz alýshylardy aqsha nemese jyljymaıtyn múlik berýge májbúrleý maqsatynda júıeli túrde kúsh qoldanyp, psıhologııalyq qysym kórsetken, — delingen habarlamada.
Budan bólek, kúdikti sot protsesterin bastamashylyq etip, 11 mln teńge kólemindegi bir qaryzdy ártúrli qujattar negizinde eki ret óndirip alǵan. Mindettemeniń is júzinde oryndalǵany týraly málimetter sotqa ádeıi usynylmaǵan. Sot sanktsııasymen qylmystyq jolmen alynǵan qarajatqa satyp alynǵan jalpy quny 1,1 mlrd teńgeni quraıtyn múlikke tyıym salyndy.
Tyıym salynǵan múliktiń qatarynda 2 páter, 2 turǵyn úı, jer telimi, sondaı-aq «LAND ROVER RANGE ROVER» jáne «HYUNDAI STARIA» avtokólikteri bar. Kúdiktige qatysty qamaýǵa alý túrindegi bultartpaý sharasy qoldanyldy.
Qylmystyq is sotqa joldandy. Qazaqstan Respýblıkasynyń Qylmystyq-protsestik kodeksiniń 201-babyna sáıkes ózge aqparat jarııa etilmeıdi.
Buǵan deıin BQO-da jol jóndeýge bólingen qarjyny jymqyrý isi boıynsha tergeý aıaqtalǵanyn jazdyq.