Anna Danılına Rolan Garros týrnıriniń shırek fınalyna shyqty

ASTANA. KAZINFORM – Qazaqstannyń juptyq syndaǵy birinshi, álemniń 17-raketkasy Anna Danılına Rolan Garros týrnıriniń shırek fınalyna joldama aldy.

 

Qazaqstandyq tennısshi serbııalyq Aleksandra Krýnıchpen birge úshinshi aınalymda «Úlken dýlyǵa» dodasynyń 5-raketkalary, amerıkalyq Aısha Mýhammad – nıderlandylyq Demı Shýrspen kezdesti.

Matchty qazaqstandyq-serbııalyq dýet qos breıkpen sátti bastady – 3:0. Budan keıin Mýhammad – Shýrs qaıyra breık jasaǵanymen, Danılına – Krýnıch degenine jetti – 6:4. Ekinshi sette Anna men Aleksandra qarqynyn tipti údetti - 6:0.

Bir saǵat 13 mınýtqa sozylǵan básekede Danılına – Krýnıch 14 breık-poınttyń beseýin paıdalandy. Mýhammad – Shýrs 1 eıs, 1 breıkten asa almady. 

Anna Danılına – Aleksandra Krýnıch jartylaı fınalǵa shyǵý úshin jarystyń 1-raketkalary, chehııalyq Katerjına Sınıakova – amerıkalyq Teılor Taýnsendpen talasady. 

Chehııalyq-amerıkalyq jup úshinshi aınalymda 2 saǵat 43 mınýtqa sozylǵan tartysty matchta majarstandyq Tımıa Babosh – brazılııalyq Lýıza Stefanıdy joldan taıdyrdy – 6:7 (6:8), 6:3, 6:4. 

Osylaısha, Frantsııa ashyq chempıonatynda Qazaqstannan Aleksandr Býblık pen Anna Danılına jarysty jalǵastyryp jatyr.

Eske sala keteıik, budan buryn Elena Rybakınanyń Rolan Garrostyń tórt dúrkin chempıonyna jol bergenin jazǵan bolatynbyz.

Rolan Garros týrnırinde Aleksandr Býblık álemniń 5-raketkasyn eline qaıtardy.