SQO-da kóktemgi sý tasqynyna qarsy 13 apattyq brıgada quryldy
PETROPAVL. KAZINFORM – Soltústik Qazaqstan oblysynda kóktemgi sý tasqyny kezeńinde respýblıkalyq mańyzy bar avtomobıl joldarynda tótenshe jaǵdaılardyń aldyn alý úshin 13 apattyq brıgada quryldy.
Jalpy bul joldarda 163 mamannan turatyn brıgadalar sý tasqyny qaýpi týyndaǵan jaǵdaıda jedel áreket etýge daıyn. Sonymen qatar jumysqa 119 arnaıy tehnıka jumyldyrylmaq.
SQO ákimdiginiń málimetinshe, kóktemde negizgi mindet – erigen qar sýynyń joldardy shaıyp ketýine jol bermeý jáne jol ınfraqurylymynyń zaqymdanýynyń aldyn alý. Máselen, 15 naýryzda mamandar joldardaǵy sý ótkizý qubyrlaryn ashyp, aınalasyndaǵy arnalardy tazalaıdy.
Keıbir jol ýchaskelerinde jóndeý kezinde jańa sý ótkizý qubyrlary ornatyldy. Mysaly: «Jezqazǵan – Petropavl» respýblıkalyq avtojolynyń qaýipti ýchaskelerinde birneshe jańa sý ótkizý qubyry ornatyldy.
Byltyr birqatar iri joba aıaqtaldy. Atap aıtqanda, Shal aqyn aýdanynda respýblıkalyq mańyzy bar «Jezqazǵan – Petropavl» avtojolynyń 746-785 shaqyrym ýchaskesine ortasha jóndeý júrgizildi. Joba aıasynda sý ótkizý qubyrlary da jańartyldy. Jumysqa 3,9 mlrd teńge jumsaldy. Sondaı-aq Ǵabıt Músirepov atyndaǵy aýdanda osy avtojoldyń 624-649 jáne 656-670 shaqyrym aralyǵynda ortasha jóndeý jumysy atqarylyp, sý ótkizý júıeleri qalpyna keltirildi. Bul jobanyń quny 4,4 mlrd teńgeden asty.
Bıyl qurylysy jalǵasatyn birneshe nysan bar. Sonyń ishinde «Jezqazǵan – Arqalyq – Petropavl» avtojolynyń 872 shaqyrymynda ortasha jóndeý júrgizilip, jańa úsh kózdi tıýbıngtik sý ótkizý qubyry ornatylyp jatyr. Jobanyń jalpy quny – 485,4 mln teńge, onyń ishinde negizgi jumystardy bıyl aıaqtaý josparlanǵan. Sonymen qatar «Petropavl qalasyn aınalyp ótý jolynyń» 27 shaqyrymynda tórt kózdi jańa sý ótkizý qubyry ornatylyp jatyr. Jobanyń jalpy quny – 196,6 mln teńge.
Budan bólek, sý tasqyny qaýpi bar ýchaskelerde sý ótkizý qubyrlaryn jóndeý jumystary jalǵasqan. Mundaı jumys «Býlaev - Vozvyshenka – Molodogvardeıskaıa – Kırov -– Qııaly – Roşınskaıa» avtojolynyń 210 shaqyrymynda jáne Tımırıazev aýdanyndaǵy «Voloshınka – Sergeevka – Tımırıazev» jolynyń birqatar ýchaskesinde atqarylyp jatyr.
Mamandardyń aıtýynsha, sý tasqyny qaýpine baılanysty óńirde 220 arnaıy tehnıka daıyn tur, onyń ishinde 98 tehnıka oblystyq joldarǵa, 122 tehnıka aýdandyq joldarǵa bekitilgen.
Erigen qar sýy joldardy shaıý qaýpi týyndasa, qorǵaý úshin aldyn ala 5 myń tonna ınertti materıal, 3 myń qap daıyndaldy. Bul materıaldar qajet bolǵan jaǵdaıda ýaqytsha bógetter jasaýǵa qoldanylady.
«QAJservıs» kompanııasynyń oblystyq fılıaly da daıyndyq jumystaryn bastady. Jospar boıynsha 40 myń tonnadan astam usaq tas, 2700 tonna qum, 52 myńnan astam qap ázirlenedi.
Buǵan deıin Petropavlda erigen qar sýy úılerge kirmeýi úshin qaladan qar táýlik boıy shyǵarylyp jatqanyn jazǵan edik.