Soltústik Qazaqstan oblysynda ámbebap qutqarý bólimshesi ashyldy
ASTANA. KAZINFORM - Soltústik Qazaqstan oblysynyń Teplıchnoe aýylynda óńirdegi alǵashqy ámbebap qutqarý bólimshesiniń saltanatty ashylýy ótti. Bul týraly Tótenshe jaǵdaılar mınıstrligi habarlady.
Pestroe kóliniń jaǵasynda ornalasqan jańa mamandandyrylǵan nysan avarııalyq-qutqarý jáne izdestirý-qutqarý jumystarynyń keń spektrin oryndaýǵa arnalǵan.
Ashylý saltanatyna Qazaqstan Tótenshe jaǵdaılar mınıstri general-maıor Shyńǵys Árinov, oblys ákimi Ǵaýez Nurmuhambetov, azamattyq qorǵaý organdarynyń ardagerleri men bólimsheniń jeke quramy qatysty.
- Bul zamanaýı keshende qyzmetkerlerge bıik jerlerde de, sý astynda da qutqarý jumystaryn júrgizýge qajetti jaǵdaı jasalǵan. Soltústik Qazaqstan oblysynda ámbebap bólimsheniń ashylýy óńir turǵyndarynyń qaýipsizdik deńgeıin edáýir arttyrady, óıtkeni qazir TJM dárigerleri de osy jerde qyzmet atqarady, - dep Shyńǵys Árinov atap ótti.
Aýdany 900-den astam sharshy metr modýldik tıptegi eki qabatty ǵımarat óńirdiń klımattyq jaǵdaıyn eskere otyryp, jeke joba boıynsha salynǵan. Keshen quramynda ákimshilik kabınetter, dońǵalaqty tehnıka men júzý quraldaryna arnalǵan garajdar jáne bokstar, oqý synyby, «Batyr Team» vedomstvolyq klýbynyń sport zaly, medıtsınalyq kabınet, psıholog kabıneti, qoıma úı-jaılary bar jóndeý blogy, sondaı-aq alty úıshik pen kınologtarǵa arnalǵan bólmesi bar kınologııalyq ortalyq kózdelgen.
TJM basshysy saltanatty túrde bólimsheniń kiltin onyń qyzmetkerlerine tapsyrdy, sodan keıin olar resmı túrde jaýyngerlik kezekshilikke kiristi. Sondaı-aq qutqarýshylardyń qaramaǵyna KamAZ markaly jańa vahtalyq avtobýs jáne qosymsha arnaıy tehnıka berildi.
Qyzmettik boryshyn úlgili oryndaǵany úshin SQO TJD jedel-qutqarý jasaǵynyń qyzmetkerleri, TJM 52859 áskerı bóliminiń áskerı qyzmetshileri, sondaı-aq Apattar medıtsınasy ortalyǵy fılıalynyń mamandary gramotalarmen jáne alǵys hattarmen marapattaldy.
Іs-shara sońynda Shyńǵys Árinov dástúrli kógaldandyrý aktsııasyna qatysyp, bólimshe aýmaǵyna qaraǵaıdyń jas kóshetterin otyrǵyzdy.
Soltústik Qazaqstan oblysy TJD jedel-qutqarý jasaǵynyń qutqarýshylary qıyn jaǵdaılarda jumys isteýge úırengen: olar bıik ǵımarattarda, taýly jerlerde, sý aıdyndarynda avarııalyq-qutqarý jáne izdestirý-qutqarý jumystaryn júrgizedi, sondaı-aq jol-kólik oqıǵalary kezinde kómek kórsetedi, adamdardyń sýdaǵy qaýipsizdigin qamtamasyz etedi.
Ótken jyly departament bólimsheleri tótenshe jaǵdaılarǵa 1950 ret shyǵyp, 127 adamdy qutqaryp, 128 jergilikti turǵyndy evakýatsııalady.
Jańa ámbebap qutqarý bólimshesiniń ashylýy TJ-ǵa odan da tıimdi áreket etýge jáne óńirdegi qaýipsizdik deńgeıin arttyrýǵa múmkindik beredi.
Aıta keteıik, Jambyl oblysy TJD-niń kúshteri sý tasqynyna qarsy is-sharalaryn júrgizý maqsatynda Aqmola oblysyna attandy.