Soltústik Qazaqstan oblysynda aldaǵy qys birshama jyly bolyp, qalypty ótpek

PETROPAVL. KAZINFORM — «Qazgıdromet» kásiporny oblystyq fılıaly qystyń úsh aıyna aýa raıy boljamyn jasady.

Aldyn ala málimetterge sáıkes, óńirdiń kóp bóliginde jaýyn-shashyn mólsheri klımattyq norma shamasynda bolady. Alaıda qys bolǵannan keıin, boransyz, kóktaıǵaqsyz ótpeıdi. Tuman túsip, qatty jel turady.

Jeltoqsan aıy

Jeltoqsanda ortasha aýa temperatýrasy –11…–13°C aralyǵynda bolmaq, bul normadan 1° joǵary (norma –12,3…–14,1°C).

Aı boıy jyly jáne sýyq aýa massalary jıi almasady. Synap baǵanasy joǵarylaǵan ýaqytta qar jaýyp, boran soǵyp, keı kúni qar jańbyrǵa ulasýy jáne kóktaıǵaq túzilýi múmkin. Bul aıda –30…–35°C deıingi qatty aıazdar da bolady degen boljam bar. Jaýyn-shashyn mólsheri 15–31 mm, bul klımattyq normaǵa saı.

Qańtar aıy

Qańtarda ortasha temperatýra –15…–17°C, ıaǵnı norma deńgeıinde bolady (norma –15,2…–17,3°C).

Aı boıy aýa temperatýrasy jıi aýytqyp, Atlantıkadan keletin jyly ári ylǵaldy tsıklondar qar, boran jáne ekpini 15–20 m/s deıin jetetin jel alyp keledi. Keıin antıtsıklonnyń áseri kúsheıip, jaýyn-shashynsyz, tynyq kúnder basym bolady.

Soltústik-batys jáne Sibir antıtsıklondarynyń áserinen keı kúni temperatýra –30°C tómen túsýi múmkin. Jaýyn-shashyn mólsheri 12–25 mm norma shamasynda bolady.

Aqpan aıy

Aqpanda ortasha temperatýra –12…–14°C, bul normaǵa qaraǵanda 1–2° jyly (norma –13,8…–15,7°C).

Aı basynda Sibir antıtsıklonynyń yqpalynan óńirde ashyq ári aıazdy kúnder basym bolady. Al aı ortasynan bastap ońtústikten jáne soltústik-batystan keletin tsıklondar jıilep, aýa raıy qubylmaly — jaýyn-shashyn (qar, jańbyr), tuman men kóktaıǵaq bolýy múmkin. Jaýyn-shashyn mólsheri normadan — 11–21 mm aspaıdy.

Sınoptıkter bul maýsymdyq boljam keńes sıpatynda jasalǵanyn jáne alda qysqa merzimdi — aılyq, onkúndik, aptalyq jáne táýliktik naqty boljamdarmen tolyqtyrylyp otyratyndyǵyn aıtady.

Sondaı-aq kún raıy buzylǵan jaǵdaıda aldyn ala eskertý beriledi. Máselen byltyr qaýipti aýa raıy qubylystary týraly 111 ret, tabıǵı apatty gıdrometeorologııalyq qubylystar boıynsha 2 ret, aýa raıynyń kúrt ózgerýi týraly bir ret eskertý berilgen.

Buǵan deıin SQO-da qarasha aıynda aýa raıy qandaı bolatyndyǵyn jazǵan edik.