Soltústik Qazaqstan oblysy 900 mlrd teńgege jýyq ınvestıtsııa tartty

ASTANA. KAZINFORM — SQO-da sońǵy 2 jylda ónerkásip óniminiń kólemi 1,5 ese ósken. Ásirese óńdeýshi ónerkásiptiń úlesi 86%-dy quraıdy. Bul týraly óńir ákimi Ǵaýez Nurmuhambetov eseptik baıandamasynda aıtty.

Máselen, óńirde ashylǵan «ZIKSTO» zaýyty jylyna 3200 jolaýshylar vagony men vagon-platformalaryn shyǵara alady, oǵan 24,3 mlrd teńge ınvestıtsııa salynǵan. Óndirilgen vagondar respýblıkadaǵy temirjoldarda qoldanylady.

— Óńirde jalpy quny 894 mlrd teńge bolatyn 51 ınvestıtsııalyq joba iske asyrylyp jatyr, osynyń arqasynda 7,8 myń jańa jumys orny ashylady. Birinshi jartyjyldyq qorytyndysy boıynsha tartylǵan tikeleı ınvestıtsııalar kólemi jyldyq jospardan 2 ese artyq boldy, — dedi Ǵ. Nurmuhambetov elordada Ortalyq kommýnıkatsııalar qyzmetinde. 

Onyń aıtýynsha, «Qyzyljar» arnaıy ekonomıkalyq aımaǵy qarjy tartýdaǵy negizgi ortalyqqa aınaldy. Óńirdiń agroónerkásiptik áleýetin eskere otyryp, arnaıy ekonomıkalyq aımaq keńeıtilip, aýyldarda eki jańa sýbaımaq qurylǵan.

— Óńirge DSP jáne LDSP plıtalaryn, traktorlar men qosalqy aýyl sharýashylyǵy tehnıkasyn, kondıterlik ónimderdi óndirý jobalaryn júzege asyratyn tek iri sheteldik kompanııalar ǵana kelip otyrǵan joq. Otandyq ınvestorlar da belsendilik tanytyp, sańyraýqulaq fermasy men kompost zaýytyn iske qosty, — dedi oblys ákimi. 

Buǵan deıin Ǵ. Nurmuhambetov Soltústik Qazaqstanda rekordtyq 6,5 mln tonna astyq jınalǵanyn aıtqan edi. 

Sondaı-aq, SQO sharýalary el boıynsha súttiń 70% óndire alady.