Soltústik Aralǵa naýryzdyń sońyna deıin 1,6 mlrd tekshe metr sý jiberiledi
ASTANA. KAZINFORM – Byltyrǵy qazannan qańtar aıyna deıin Soltústik Aralǵa 1 mlrd tekshe metr sý jiberildi. Al naýryz aıynyń sońyna deıin taǵy 1,6 mlrd tekshe metr sý jiberiledi. Bul týraly QR Sý resýrstary jáne ırrıgatsııa mınıstrliginiń resmı ókili Móldir Ábdýalıeva aıtty.
— Soltústik Aral teńizin toltyrý jáne ony qalpyna keltirý jumysy jalǵasyp jatyr. Ótken jyldyń qazanynan bastap osy jyldyń qańtaryna deıin Soltústik Aralǵa 1 mlrd tekshe metrden astam sý jiberildi. Bul osyǵan deıin josparlanǵan kólemnen 100 mln tekshe metrge artyq, - dedi ol OKQ alańynda.
Resmı ókil el arasyndaǵy «Soltústik Aral sý tasqynynan ne jańbyr esebinen tolyp jatyr» degen pikirdiń qate ekenin atap ótti. Sebebi elimizdiń ońtústik óńirinde aıtarlyqtaı sý tasqyny bolmaǵan. Aralǵa sý jiberý – sý resýrstaryn únemdeýdiń jáne sý dıplomatııasynyń naqty nátıjesi.
— Ortalyq Azııadaǵy áriptestermen jasalǵan kelisimderdiń arqasynda kele jatqan naýryz aıynyń sońyna deıin taǵy 1,6 mlrd tekshe metr sý jiberiledi. Qazir Soltústik Araldaǵy sýdyń jalpy kólemi 22 mlrd tekshe metr-den asady. Ósý dınamıkasyn salystyrar bolsaq, 2022 jyldyń basynda bul kórsetkish 18,9 mlrd tekshe metr bolǵan. Osy jyldyń sońyna deıin teńizdegi sý mólsheri 23,4 mlrd tekshe metrge jetedi dep kútilýde. Al 2030 jyldyń sońyna deıin sý mólsherin 27 mlrd tekshe metrge jetkizý josparlanyp otyr, - dedi Móldir Ábdýalıeva.
Aıta keteıik, Soltústik Araldy saqtaý jobasynyń alǵashqy kezeńiniń nátıjesinde teńizdegi sý 42%-ǵa ulǵaıdy.