Soltústik Araldyń sý aıdyny 870 sharshy shaqyrymǵa ulǵaıyp, tuzdylyǵy eki esege kemidi
ASTANA. KAZINFORM- Qazaqstan Soltústik Araldy qalpyna keltirý tájirıbesin Túrkııanyń Antalıa qalasynda ótken BUU-nyń Klımattyń ózgerýi týraly negizdemelik konventsııasy taraptarynyń 31-konferentsııasynda (COP31) tanystyrdy, dep habarlaıdy QR sý resrýstary jáne ırrıgatsııa mınıstrligiiń baspasóz qyzmeti.
Paneldik sessııada Sý resýrstary jáne ırrıgatsııa vıtse-mınıstri Arsen Jaqanbaev «Syrdarııa ózeniniń arnasyn retteý jáne Aral teńiziniń soltústik bóligin saqtaý» jobasynyń nátıjeleri men Soltústik Araldy qalpyna keltirýge baǵyttalǵan jańa bastamalar týraly baıandady.
Іs-shara mınıstrliktiń bastamasymen sý ekojúıelerin qalpyna keltirý jáne Soltústik Aral teńizin qaıta jandandyrý tájirıbesine arnalǵan paneldik sessııa aıasynda uıymdastyryldy.
Vıtse-mınıstrdiń aıtýynsha, Dúnıejúzilik banktiń qoldaýymen júzege asyrylǵan jobanyń birinshi kezeńi nátıjesinde Kókaral bógetiniń salynýy Soltústik Araldyń sý aıdynyn 870 sharshy shaqyrymǵa ulǵaıtýǵa múmkindik berdi. Sonymen qatar sýdyń tuzdylyǵy shamamen eki ese tómendedi.
Sondaı-aq qatysýshylarǵa «Soltústik Aral teńizi jáne ırrıgatsııa júıelerin jańǵyrtý» keshendi jobasy tanystyryldy. Ol sýarý ınfraqurylymyn jańǵyrtýdy kózdeıdi. Jobanyń birinshi kezeńi 2027–2030 jyldarǵa josparlanǵan jáne Dúnıejúzilik banktiń qaryzy esebinen iske asyrylady.
Budan bólek, Qazaqstan halyqaralyq yntymaqtastyqtyń úsh negizgi baǵytyn usyndy. Olar – tájirıbe almasý, sý ekojúıelerin qalpyna keltirýdi turaqty qarjylandyrý jáne naqty nátıjelerge baǵyttalǵan birlesken jobalardy júzege asyrý.
-Soltústik Araldy qalpyna keltirý – bul tek ınjenerlik joba ǵana emes, sonymen qatar ekojúıeni qalpyna keltirýge jáne óńirdiń turaqtylyǵyn arttyrýǵa baǵyttalǵan keshendi jumys. Bizdiń tájirıbemiz ınjenerlik sheshimder sýdy utymdy paıdalanýmen ushtasqanda ǵana turaqty nátıje beretinin kórsetedi. Qazaqstan Soltústik Araldy qalpyna keltirý tájirıbesin bólisýge jáne basqa óńirlerde qoldanýǵa bolatyn tásilderdi birlesip zerdeleýge daıyn, – dedi Arsen Jaqanbaev.
Aıta keteıik, osyǵan deıin Túrkııada Qazaqstannyń Aral mańy ekojúıelerin qalpyna keltirý tájirıbesi tanystyryldy.
