Soltústik Araldyń kólemin ulǵaıtý boıynsha belgilengen kórsetkishter merziminen buryn oryndalyp jatyr
ASTANA. KAZINFORM — Soltústik Araldyń kólemin ulǵaıtý boıynsha Sý resýrstaryn basqarý júıesin damytý tujyrymyndamasynda belgilengen kórsetkishter merziminen buryn oryndalyp jatyr. Bul týraly vedomstvonyń baspasóz qyzmeti málim etti.
Memleket basshysynyń Qazaqstan halqyna Joldaýynda bergen tapsyrmalaryn oryndaý aıasynda Sý resýrstary jáne ırrıgatsııa mınıstrligi Soltústik Aral teńizindegi sýdyń kólemin arttyrý jumysyn júrgizip jatyr.
2023 jyldan búginge deıin Soltústik Araldaǵy sý kólemi 24,1 mlrd tekshe metrge deıin jetti. Osy ýaqyt ishinde teńizge 5 mlrd tekshe metr sý jiberildi. Osylaısha, Soltústik Araldyń kólemin ulǵaıtýǵa qatysty Sý resýrstaryn basqarý júıesin damytý tujyrymdamasyndaǵy maqsatty kórsetkishter jospardan buryn oryndalyp jatyr.
Tujyrymdamaǵa sáıkes, 2025 jyly teńizdegi sý kólemin 20,6 mlrd tekshe metrge jetkizý kózdelgen bolatyn. Al bastapqy jospar boıynsha, 2030 jylǵa qaraı Soltústik Araldyń kólemi 27 mlrd tekshe metrge jetýi tıis. Qazirgi kórsetkishterge 2029 jyly qol jetkizý josparlanǵan bolatyn.
– Qazirgi ýaqytta Dúnıejúzilik banktiń granty esebinen Soltústik Araldy saqtaý jobasynyń tehnıkalyq-ekonomıkalyq negizdemesi ázirlenip jatyr. Jergilikti turǵyndardyń pikirin eskere otyryp, Aqshataý jáne Qamystybas kól júıelerindegi sý deńgeıin turaqtandyrý úshin sý torabyn salyp, Kókaral bógetin 2 metrge ulǵaıtý nusqasy qarastyrylyp jatyr. Joba Soltústik Araldaǵy sýdyń kólemin arttyrýǵa jáne sapasyn jaqsartýǵa, Syrdarııa ózeniniń atyraýyn qalpyna keltirýge, teńiz túbinen tuzdy shógindilerdiń ushýyn azaıtýǵa, Qyzylorda oblysynda balyq sharýashylyǵyn damytýǵa jáne jergilikti halyqtyń turmys jaǵdaıyn jaqsartýǵa baǵyttalǵan, – dedi Sý resýrstary jáne ırrıgatsııa mınıstri Nurjan Nurjigitov.
Aıtap keteıik, bıyl kóktemde Úkimet basshysynyń orynbasary Qanat Bozymbaev Araldy qutqarý qorynyń reformasynan zor úmit kútiletinin málimdegen edik.