Soltústik Araldy saqtaý jobasyna Qazaqstan qansha qarajat bóldi

ASTANA. KAZINFORM — Qazaqstanda Soltústik Aral teńizin saqtaý jobasynyń ekinshi kezeńin iske asyrýǵa daıyndyq júrip jatyr. Ony qarjylandyrý máselesin jaqyn arada sheshý josparlanǵan. Bul týraly Sý resýrstary jáne ırrıgatsııa birinshi vıtse-mınıstri Nurlan Aldamjarov aıtyp berdi. 

Vıtse-mınıstrdiń aıtýynsha, 2023 jyldan beri Soltústik Araldy saqtaý jumystaryna bıýdjetten shamamen 4 mıllıard teńge bólingen.

Qazirgi ýaqytta Soltústik Aral teńiziniń kólemi 23 tekshe shaqyrym. Kórsetkishter «Qazgıdromet» RMK gıdrobeketteriniń kúndelikti monıtorıngi arqyly jasalady.

Qazir Sý resýrstary mınıstrligi Soltústik Aral teńizin saqtaý jobasynyń ekinshi kezeńi boıynsha jumystardy bastady.

— Qazir tehnıkalyq-ekonomıkalyq negizdeme saraptamadan ótip jatyr, tipti aıaqtalýǵa jaqyn. Qarjylandyrý boıynsha halyqaralyq qarjy uıymdarymen, sonyń ishinde Dúnıejúzilik bankpen jumys istep jatyrmyz. Jaqyn ýaqytta qarjylandyrý kólemi aıqyndalady, — dedi Nurlan Aldamjarov Úkimettegi brıfıngte.

Sonymen birge, qoldanystaǵy jobalardy da iske asyrý jalǵasady. Atap aıtqanda, Kókaral bógetiniń apatty ýchaskeleri qalpyna keltirilmek. Jobany bıyl jyl sońyna deıin aıaqtaý josparlanyp otyr.

Buǵan deıin Úkimet Soltústik Aral jobasynyń ekinshi kezeńine de qarjy syrttan tartylatynyn aıtqan edi.