«Soltústik Araldy saqtaý» jobasy: Bıyl qandaı nátıjege qol jetkiziledi
ASTANA. KAZINFORM — Dúnıejúzilik bankpen birlese Aral teńiziniń soltústik bóligin qalpyna keltirý jobasynyń tehnıkalyq-ekonomıkalyq negizdemesi ázirlenip jatyr. Bul týraly Kazinform saýalyna Sý resýrstary jáne ırrıgatsııa mınıstrliginiń resmı jaýabynda aıtyldy.
Ótken jyly «Soltústik Araldy saqtaý» jobasy júzege asyrylǵan bolatyn. Vedomstvo jobanyń alǵashqy kezeńinde qol jetkizgen nátıjelerdi jarııalady:
- Teńizdegi sý kólemi 42%-ǵa ulǵaıdy
- Teńiz sýynyń tuzdylyǵy tórt esege jýyq nemese lıtrine 8,89 gramǵa deıin azaıdy
- Balyqtyń 15 shaqty túri qaıta oraldy jáne bekire tuqymdas balyqtardy ósirý úshin qolaıly jaǵdaı jasaldy
- Syrdarııa ózeniniń sý ótkizý qabileti sekýndyna 700 m3-ge deıin ulǵaıdy
- Aral teńiziniń soltústik bóligi geografııalyq jáne klımat túzýshi obekt retinde saqtaldy.
Sondaı-aq osy jumystardy jalǵastyrý maqsatynda mınıstrlik Dúnıejúzilik bankpen birlesip «Aral teńiziniń soltústik bóligin óńirlik damytý jáne qalpyna keltirý» jobasynyń tehnıkalyq-ekonomıkalyq negizdemesin (TEN) ázirlep jatqanyn málimdedi.
TEN jobasy mynadaı negizgi nátıjelerge qol jetkizýge baǵyttalǵan:
- teńiz sýynyń jınaqtalý kólemi men sapasyn jaqsartý
- Aral teńiziniń túbinen tuz shógindileriniń shyǵýyn azaıtý
- sý resýrstaryn ekologııalyq basqarýdy jaqsartý
- balyq ónimin molaıtýdy jáne qaıta óńdeýdi qoldaý arqyly balyq sharýashylyǵyn damytý.
— Qazirgi ýaqytta jobaǵa jaýapty uıym memlekettik saraptama bergen eskertýler men usynystar boıynsha túzetýler engizip, memlekettik saraptamanyń qaraýyna qaıta joldady, — dep jazylǵan jaýapta.
Endi memlekettik saraptamanyń qorytyndysyn alǵannan keıin qoǵamdyq tyńdaýlar ótkizilip, keıin ekonomıkalyq jáne ekologııalyq saraptamalar júrgiziledi.
TEN ázirleý jumysynyń qorytyndysyna sáıkes Aral teńiziniń soltústik bóligin qalpyna keltirý jobasyn iske asyrý shemalary men túpkilikti tehnıkalyq sheshimderi qabyldanatyn bolady.
Deıturǵanmen, Soltústik aral jobasy minsiz emes. Aral teńiziniń máselesin qozǵap júrgen Májilis depýtaty Marhabat Jaıymbetov jergilikti halyq Sý resýrstary mınıstrligi usynǵan eki deńgeıli shemaǵa túbegeıli qarsy ekenin aıtqan. Olar Kishi Aral jobasyna da mán berilýin talap etip otyr.