Soltústik Araldy saqtaý: Sý mınıstrligi men Dúnıejúzilik bank jańa jobany qolǵa aldy

ASTANA.KAZINFORM - Sý resýrstary jáne ırrıgatsııa mınıstri Nurjan Nurjigitov Qazaqstandaǵy Dúnıejúzilik banktiń turaqty ókili Andreı Mıhnevpen kezdesti.

Kezdesýde taraptar ázirlenip jatqan birlesken jobalardy iske asyrý tetikterin talqylady. Atap aıtqanda, Soltústik Araldy saqtaý jobasynyń ekinshi kezeńin júzege asyrý máselesi qaraldy.

Mınıstrlik málimetinshe, bul joba teńizdegi sý deńgeıin kóterý úshin Kókaral bógetin rekonstrýktsııalaýdy kózdeıdi. Qazirgi ýaqytta jobany ázirleý jumystary aıaqtalýǵa jaqyn. Sonymen qatar Qyzylorda oblysyndaǵy ırrıgatsııa jelilerin tsıfrlandyrý jáne avtomattandyrý elementterin engize otyryp qalpyna keltirý jobasy da daıyndalyp jatyr.

Bul sýdy neǵurlym tıimdi paıdalanýǵa múmkindik berip, únemdelgen sý kólemin Soltústik Aral teńizine baǵyttaýǵa jol ashady. Qazir bul jobalar memlekettik saraptamadan ótkizilip jatyr.

Kezdesý qorytyndysy boıynsha taraptar birlesken bastamalardy iske asyrý máselelerin QR Premer-mınıstriniń tóraǵalyǵymen ótetin Halyqaralyq qarjy uıymdarymen jumys jónindegi úılestirý keńesiniń qaraýyna shyǵarý týraly kelisti.

— V Ulttyq quryltaıda Memleket basshysy Soltústik Aral teńizin saqtaý máselesine aıryqsha nazar aýdardy. Bul másele memlekettik sý saıasatynyń basym baǵyttarynyń biri bolyp qala beredi. Transshekaralyq sý boıynsha barlyq kórshiles elmen jańa quqyqtyq baza qalyptastyrylyp jatyr, turaqty ózara is-qımyl men úılestirýdi qamtamasyz etetin ekijaqty komıssııalar qurylyp, jumys istep tur. Soltústik Araldy saqtaý jáne qalpyna keltirý — tek ekologııalyq qana emes, áleýmettik ári strategııalyq mańyzy bar mindet. Sondyqtan bul jobanyń biz úshin mańyzy erekshe, - dedi Sý resýrstary jáne ırrıgatsııa mınıstri Nurjan Nurjigitov.

Aıta keteıik, Soltústik Araldaǵy sý kólemin 34 mlrd tekshe metrge deıin ulǵaıtý josparlanyp otyr.

Soltústik Aral jobasynyń ekinshi kezeńine de qarjy syrttan tartylady.