Soltústik Araldaǵy sý kólemin 34 mlrd tekshe metrge deıin ulǵaıtý josparlanyp otyr – QR SRIM
ASTANA. KAZINFORM – Soltústik Aral teńizin qalpyna keltirý josparlary týraly QR Sý resýrstary jáne ırrıgatsııa birinshi vıtse-mınıstri Nurlan Aldamjarov Ortalyq kommýnıkatsııalar qyzmetinde ótken brıfıngide málimdedi.
Onyń aıtýynsha, búgin Úkimet otyrysynda Sý resýrstary jáne ırrıgatsııa mınıstri Nurjan Nurjigitov Soltústik Araldy qalpyna keltirý boıynsha josparlardy baıandaǵan.
– Qazirgi tańda Soltústik Aral teńiziniń sý kólemi shamamen 23 mıllıard tekshe metr. Aldaǵy josparymyz – Soltústik Araldy qalpyna keltirýdiń ekinshi kezeńin iske asyrý. Bul joba aıasynda teńizdegi sýdyń kólemin jobalyq 27 mıllıard tekshe metrden 34 mıllıard tekshe metrge deıin arttyrý kózdelip otyr. Qazir osy baǵytta tıisti jumystar júrgizilip jatyr, – dedi Nurlan Aldamjarov.
Birinshi vıtse-mınıstr baıandamasynda Syrdarııa ózeni basseınindegi Qazaqstan men Ózbekstan arasyndaǵy yntymaqtastyqtyń jańa deńgeıge kóterilgenin atap ótti. Atap aıtqanda, ótken jyldyń 15 qarashasynda transshekaralyq sý nysandaryn birlesip basqarý týraly jańa kelisimge qol qoıylǵan. Bul qujat sý resýrstaryn keshendi basqarýǵa jáne uzaqmerzimdi jobalardy júzege asyrýǵa múmkindik beredi.
– Sý paıdalanýdy úılestirý jáne sý qoımalarynyń jumys rejımderin kelisý boıynsha qabyldanǵan sharalar óńir ekologııasyna, sonyń ishinde Soltústik Aral teńiziniń saýyqtyrýyna oń áserin tıgizip otyr. Bul memleketaralyq kelisilgen sheshimderdiń tıimdiligin kórsetedi, – dedi ol.
Nurlan Aldamjarovtyń aıtýynsha, sý tapshylyǵy baıqalǵan kezeńge qaramastan, sońǵy úsh jylda Syrdarııa ózenindegi sý qoımalarynyń jumys rejımin kelisý jáne memleketaralyq kelisimderdi qatań saqtaý nátıjesinde Soltústik Aral teńizine 6 tekshe kılometrden astam sý jiberilgen.
Nátıjesinde Soltústik Aral teńiziniń kólemi 2023 jyldyń basyndaǵy 18,4 tekshe kılometrden qazirgi ýaqytta 23 tekshe kılometrge deıin ulǵaıǵan.
Buǵan deıin Soltústik Aral teńizin saqtaý jobasynyń ekinshi kezeńi ázirlenip jatyr. Onda Kókaral bógetin qaıta qurý jáne teńiz deńgeıin Baltyq júıesi boıynsha 44 metrge deıin kóterý kózdelgenin jazǵanbyz.