Soltústik Aralda qansha sý bar
SAMARQAND. KAZINFORM — Keıingi 2 jylda Soltústik Aralǵa 4,5 mlrd tekshe metr sý keldi. Bul týraly Samarqandtaǵy Klımat forýmyna qatysqan Sý resýrstary jáne ırrıgatsııa mınıstri Nurjan Nurjigitov málim etti, dep habarlaıdy Kazinform agenttiginiń menshikti tilshisi.
— Ortalyq Azııanyń 5 memleketine ortaq úlken tájirıbe bar — ol Araldy qutqarý halyqaralyq qory. Osy birlestiktiń aıasynda eki turaqty komıssııa jumys isteıdi: biri — ekologııa, ekinshisi sý salasynda. Osy jumystyń arqasynda biz Soltústik Araldy saqtap qaldyq. Búginde onda 23 mlrd tekshe metr sý bar. Kókaral dambasy salynǵan soń keıingi eki jylda oǵan 4,5 mlrd tekshe metr sý keldi. Birlesken jumystyń arqasynda osyndaı nátıjege qol jetkizdik, — dep málim etti mınıstr Kazinform tilshisiniń saýalyna jaýap bere otyryp.
Nurjan Nurjigitov Úlken Aral tabanyn jasyl jelekke aınaldyrý jumysy da qarqyndy júrip jatqanyn atap ótti. Qazirgi tańda 2 mln gektardan astam aımaqqa sekseýil otyrǵyzylyp jatyr.
Qosa keteıik, buǵan deıin vedomstvo basshysy Ortalyq Azııa elderiniń Halyqaralyq sý-energetıka konsortsıýmyn qurýmen aınalysatyn qazaqstandyq jumys tobyn qurǵanyn málimdegen edi.
Eske salaıyq, osy kúnderi Ózbekstannyń Samarqand qalasynda Klımat forýmy ótip jatyr. Іs-sharanyń ashylý saltanatyna Memleket basshysy Qasym-Jomart Toqaev qatysyp, sóz sóıledi. Onda Prezıdent Ortalyq Azııa óńirindegi jahandyq jylyný álemdegi ortasha kórsetkishten eki ese jyldam júrip jatqanyna toqtaldy.
Sonymen qatar atalǵan forýmǵa qatysqan QR Ekologııa jáne tabıǵı resýrstar mınıstri Erlan Nysanbaev klımattyń ózgerýi máselesi aımaqtyq aýqymda tıimdi sheshilýi kerek ekenin málimdedi.