Soltústik Aral jobasynyń ekinshi kezeńine de qarjy syrttan tartylady — Úkimet otyrysy

ASTANA. KAZINFORM — Premer-mınıstr Oljas Bektenov Úkimet otyrysynda Sý resýrstary jáne ırrıgatsııa mınıstrligine Soltústik Aral jobasynyń ekinshi kezeńine syrttan qarajat tabýdy tapsyrdy.

— Aral teńiziniń máselesi Memleket basshysynyń turaqty nazarynda. Sý resýrstary mınıstrligi osy jyldyń 30-shy maýsymyna deıin Soltústik Aral teńizin saqtaýdyń ekinshi kezeńin daıyndaýdy aıaqtap, jyl sońyna deıin qarjylandyrý máselesin, onyń ishinde halyqaralyq uıymdar esebinen qarjylandyrýdy sheshýi qajet. Memleket basshysynyń Birikken Ulttar Uıymynyń alańynda Halyqaralyq sý uıymyn qurýǵa qatysty bastamasyn odan ári ilgeriletý jóninde sharalar qabyldaý qajet. Sý resýrstary mınıstrligi Energetıka mınıstrligimen birlesip, bıyl Qazaqstannyń sý-energetıkalyq resýrstary kartasyn ázirlesin, — dedi Úkimet basshysy.

Sondaı-aq, ol Prezıdent keshegi Ulttyq quryltaı otyrysynda ekonomıkanyń túrli salalaryn damytýǵa ǵylymı áleýettiń tolyq paıdalanylmaı otyrǵanyn synaǵanyn eske saldy.

— Biz qolda bar ǵylymı ázirlemelerge súıenip, ózekti zertteýlerge tapsyrystardy jedel qalyptastyrýǵa tıispiz. Jýyrda men Ǵylym akademııasynyń ókilderimen kezdesý ótkizýdi josparlap otyrmyn, onda ózara is-qımyldyń jańa tetikterin talqylaımyz, — dedi Premer-mınıstr. 

Keshe Memleket basshysy Qasym-Jomart Toqaev V Ulttyq quryltaıda Kishi Aral sýynyń kólemin aıtarlyqtaı kóbeıtý baǵytynda jumys isteý kerektigin aıtqan edi.