Soltústik Aral tolyǵyp keledi: sý kólemi 23,5 tekshe shaqyrymǵa jetti
ASTANA. KAZINFORM — Qazaqstannyń sý dıplomatııasy men Syrdarııadaǵy sý rejımin úılestirý Soltústik Aralǵa túsetin aǵyndy turaqtandyrýǵa múmkindik berdi. Sonyń nátıjesinde teńizdiń kólemi 2023 jylǵy 18,4 tekshe shaqyrymnan 23,5 tekshe shaqyrymǵa deıin ósti. Bul týraly Sý resýrstary jáne ırrıgatsııa mınıstriligi málim etti.
Transshekaralyq sýlar boıynsha Qazaqstan barlyq irgeles memlekettermen quqyqtyq baza qalyptastyryp, ekijaqty komıssııalardyń jumysyn jolǵa qoıdy. Ózbekstanmen transshekaralyq sý obektilerin birlesip basqarý jáne utymdy paıdalaný týraly kelisimge qol qoıyldy.
Syrdarııadaǵy sý qoımalarynyń kelisilgen jumys rejımderi Soltústik Aral teńizine, tipti sý az kezeńderde de turaqty aǵyn kólemin ustap turýǵa múmkindik beredi. Onyń kólemi 2023 jyly 18,4 tekshe shaqyrymnan 23,5 tekshe shaqyrymǵa deıin ósti.
Sońǵy eki jylda Balqash kóline shamamen 30 tekshe shaqyrym sý kelip tústi, sonyń nátıjesinde sý aıdynynyń deńgeıin turaqtaldy. Frantsııanyń damý agenttiginiń qoldaýymen ekojúıeni saqtaýdyń 2040 jylǵa deıingi Master-jospary daıyndalyp jatyr.
Qapshaǵaı sý qoımasy úshinshi jyl qatarynan 100% toldy. Buqtyrma sý qoımasyna 2024-2025 jyldary kelgen jalpy sý aǵyny 58,6 mlrd tekshe metr boldy, bul ony qaıtadan toltyrýǵa jáne Ertis ózeniniń aǵysyn turaqty túrde rettep otyrýǵa múmkindik berdi.
Sý únemdeý mádenıeti bilim berý úderisi men kúndelikti ómirdiń ajyramas bóligine birtindep aınalyp keledi. «Sýdy únemde – bolashaqty saqta» jobasy aıasynda ótkizilgen ashyq sabaqtar men ekosaǵattar elimizdegi 3,3 mln-nan astam mektep oqýshysyn, ıaǵnı oqýshylardyń shamamen 80%-yn, sondaı-aq 35 myńnan astam stýdentti qamtydy. Іs-sharalar 2,5 myńnan astam mektepte, 100-den astam kolledjde jáne 19 ýnıversıtette ótti.
«Taza Qazaqstan» ulttyq bastamasy aıasynda «Móldir bulaq» aktsııasy jalǵasýda. 2025–2026 jyldary ol elimizdiń barlyq óńirlerin qamtydy: 94 bulaq pen 62 sý obektisi abattandyryldy, 24 myńnan astam adam qatysty, 300 tonnaǵa jýyq qoqys jınaldy.
Aktsııa aıasynda sý salasyndaǵy alǵashqy «Bolashaqtyń qaınary» volonterlik qozǵalysy da quryldy. Bastama Taraz qalasyndaǵy Qazaq ulttyq sý sharýashylyǵy jáne ırrıgatsııa ýnıversıtetiniń stýdentterinen bastaý alyp, búginde elimizdiń basqa da óńirlerinde júzege asyrylyp jatyr.
2026 jyly sý salasynyń ókilderi alǵash ret pedagogterdiń tamyz konferentsııasyna qatysyp, onda sýdy únemdeý qaǵıdattaryn bilim berý jáne tárbıe protsesine engizý tásilderin usyndy. Mektepter úshin sý únemdeý taqyryby boıynsha oqý materıaldaryn qamtıtyn «Sý sandyǵy» ádistemelik resýrsy ázirlendi. Jınaqty Sý resýrstarynyń aqparattyq-taldaý ortalyǵy Frantsııanyń damý agenttigimen, ıÝNISEF-pen jáne Halyqaralyq Araldy qutqarý qorynyń Atqarýshy komıtetimen birlesip daıyndady.
Aıta keteıik, Qazaqstanda 4,6 myń shaqyrym sý kanaly jańartylady.
