Soltústik Aral teńizin saqtaý jobasynyń ekinshi kezeńi ázirlendi
ASTANA.KAZINFORM - Sý resýrstary jáne ırrıgatsııa mınıstrligi Dúnıejúzilik bankpen birlesip Soltústik Aral teńizin saqtaý jobasynyń ekinshi kezeńin ázirledi.
Mınıstrlik málimetinshe, jobada Soltústik Araldaǵy sý deńgeıin Baltyq júıesi boıynsha 44 metrge deıin kóterý úshin Kókaral bógetin rekonstrýktsııalaý kózdelgen. Nátıjesinde sý aıdynynyń aýmaǵyn 3 913 sharshy shaqyrymǵa deıin, al sý kólemin 34 mlrd tekshe metrge deıin ulǵaıtý josparlanyp otyr.
Sonymen qatar mınıstrlik Túrkistan jáne Qyzylorda oblystaryndaǵy Aral-Syrdarııa basseıniniń ırrıgatsııa júıelerin jańǵyrtý jáne avtomattandyrý boıynsha 160-tan astam jobalaý-smetalyq qujat ázirlep jatyr. Bul jumystar sýdy tıimdi paıdalanýǵa múmkindik berip, únemdelgen sý kólemin Soltústik Aralǵa baǵyttaýǵa jaǵdaı jasaıdy.
Qazirgi ýaqytta joba QR Premer-mınıstriniń tóraǵalyǵymen jumys isteıtin Halyqaralyq qarjy uıymdarymen jumys jónindegi úılestirý keńesiniń qaraýyna usynylyp otyr. Jobany iske asyrý merzimi — 2026-2029 jyldar.
Eske salaıyq, sońǵy úsh jylda Syrdarııa ózenindegi sý qoımalarynyń jumys rejımin kelisý jáne memleketaralyq kelisimderdi qatań saqtaý nátıjesinde Soltústik Aral teńizine 6 mlrd tekshe metrden astam sý keldi. Sonyń nátıjesinde teńizdegi sý kólemi 2022 jyldyń sońyndaǵy 18,9 mlrd tekshe metrden 2025 jyldyń sońyna qaraı 23 mlrd tekshe metrge deıin artty.
– Memleket basshysy Soltústik Aral teńizin saqtaý máselesiniń mańyzyn birneshe ret atap ótti. Byltyr Qazaqstan men Ózbekstan úkimetteri arasynda transshekaralyq sý nysandaryn birlesip basqarý jáne utymdy paıdalaný týraly kelisimge qol qoıyldy. Ortalyq Azııa elderi úshin Soltústik Araldy saqtaý jáne qalpyna keltirý – tek ekologııalyq másele ǵana emes, sonymen qatar áleýmettik ári strategııalyq mindet, – dedi Sý resýrstary jáne ırrıgatsııa mınıstri Nurjan Nurjigitov.
Aıta keteıik, Aral teńiziniń ekojúıesin jaqsartýǵa baılanysty Qazaqstanda álemdik mańyzy bar joba iske qosylmaq.
Qazaqstan men Ózbekstan Aral teńiziniń qurǵaǵan tabanynda jasyl jelek otyrǵyzý jumysyn talqylady.
