Soltústik Amerıka turǵyndary Kúnniń tolyq tutylýyn kórdi

ASTANA. KAZINFORM – Soltústik Amerıka turǵyndary Kúnniń tolyq tutylýyn baqylady. Bul qubylys shamamen 18 aıda bir ret kezdesedi, ol Jerdiń ár jerinde baıqalady.

 

Tutylýdyń jalpy fazasy uzaqqa sozylmasa da – bar bolǵany 4 mınýt 28 sekýnd, ony 31 mln-nan astam adam baqylaı aldy.

Aı Kúndi jaýyp bastaǵan sátten bastap tolyq tutylý fazasyna deıin shamamen 80 mınýt ótti, sodan keıin bul protsestiń aıaqtalýyna taǵy 80 mınýt qajet boldy.

Tutylýdy birinshi bolyp Meksıka turǵyndary, keıin AQSh pen Kanada turǵyndary baqylady.

Mehıkoda erekshe qubylysty baıqaǵysy keletinder qaladaǵy kúnniń tutylýyn baqylaý úshin jabdyqtalǵan oryndardyń biri – Hoakın Galo atyndaǵy planetarııge keldi.

Al AQSh turǵyndary eldiń kóleńkede bolatyn aımaqtaryna jınala bastady. Jergilikti bılik uıaly baılanys jelileriniń shamadan tys júktelýi múmkin ekenin eskertti. Keıbir qalalarda tótenshe jaǵdaı jarııalanyp, tártip saqtaý úshin Ulttyq ulan sarbazdary tartyldy.

Kún tolyq tutylǵan qalalar qatarynda Mazatlan, Meksıka; San-Antonıo, Ostın jáne Dallas, Tehas; Indıanapolıs, Indıana; Klıvlend, Ogaıo; Erı, Pensılvanııa; Nıagara sarqyramasy, Nıý-Iork, Ontarıo jáne Monreal, Kvebek bar.

Jartylaı tutylý Soltústik Amerıkada «tolyq joldan» tys kórinedi.

Eske sala ketsek, Ortalyq Azııa men Eýropada kún tutylý baıqalmaıdy.