Soltústiktegi kolonııa kúnine 700 qaptama qurt shyǵarady
SQO QAJD baspasóz qyzmetiniń málimetinshe, ES-164/3 mekemesi aýmaǵynda jeti kásipker óz isin ashqan. Olar sottalǵandardy jumyspen qamtyp otyr. Bir aı buryn munda qurt óndirisi jolǵa qoıyldy. Ulttyq taǵamdy daıyndaýǵa 5 adam jumyldyrylǵan. Olar eki aýysymda táýlik boıy jumys isteıdi, sáıkesinshe eńbekaqy alady.
«Bizge kúndelikti qurt jetkizedi. Biz ony usaqtap, túrli qospalardy - maı, sút, tuzdy qosamyz. Salmaǵy 8-10 gr bolatyndaı etip dóńgeletip, qalypqa keltiremiz. Keıin keptirip, satýǵa yńǵaıly etip 30 gr bólip salamyz. Kúnine orta eseppen osyndaı 700 qaptama ázirleımiz. Bir kúnde shamamen 40 keli irimshik jumsalady. Іske kirispes buryn bizge qalaı isteý kerektigin eki kún boıy tehnolog úıretti. Buryn qurtty qalaı isteıtinin ájelerimizden kóretinmin. Al jalpy mamandyǵym – agronom», - deıdi qurt óndirý tsehynyń jumysshysy Arman Móńkebaev.
Arman Qostanaı oblysynyń týmasy, ishimdik ishken kúıi úsh márte kólik tizgindegeni úshin 3 jylǵa bas bostandyǵynan aıyrylǵan. Sonyń tek 4 aıyn ǵana ótegen eken.
«Sáýir aıynda kásipker bizge usynysymen keldi. Bos turǵan ǵımaratty kórsettik, oǵan unady. Bir aı óndiristi bastaýǵa ketti, tsehty daıyndady, qajetti qondyrǵylardy kirgizdi. Sottalǵandardy oqytty, tamaq óndirisi bolǵandyqtan olardy arnaıy medıtsınalyq tekseristen ótkizip, qujattaryn ázirledi. Tek sodan keıin ǵana iske kiristi», - deıdi SQO boıynsha QAJD ES-164/3 mekemesi bólimshesiniń bastyǵy Baýyrjan Rústemov.
Jalpy SQO-daǵy túzetý mekemelerinde qazirgi ýaqytta 1600 sottalǵan bar. Eńbekke jaramdy jazasyn óteýshilerdiń búginde 55 %-y jumyspen qamtylǵan.
