Soltústikte tirkelgen qus tumaýy adamdarǵa qaýipti me

NUR-SULTAN. QazAqparat – Soltústik Qazaqstandaǵy qus tumaýynyń tirkelý jaǵdaıy azamattardyń densaýlyǵyna qaýipti me? Bul suraqqa QR Densaýlyq saqtaý mınıstrligi Taýarlar men kórsetiletin qyzmetterdiń sapasy men qaýipsizdigin baqylaý komıtetiniń tóraǵasy Tımýr Sultanǵazıev jaýap berdi, dep habarlaıdy QazAqparat tilshisi.

«Birden aıta keteıin: vırýs adamnan adamǵa taramaıdy. Aýrý juqtyrǵan qustardan adamdardyń qus tumaýyn juqtyrý jaǵdaıy óte sırek kezdesedi. Qus etinen nemese jumyrtqasynan adamǵa vırýs juqqan jaǵdaı múlde tirkelmegen. Osylaısha búgingi kúni qus tumaýyn juqtyrǵan azamattardyń elde tirkelmegenin aıtýǵa bolady», - dedi ol Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, Soltústik Qazaqstandaǵy qus tumaýynyń órshý jaǵdaıyna baılanysty bir-birimen qatynasta bolǵan 400 adam anyqtalǵan. Olardyń bári de qus fabrıkasynda eńbek etetin qyzmetkerler.

«Barlyǵyna medıtsınalyq baqylaý engizildi. Olardyń jaǵdaıy jaqsy. Sonymen birge qus tumaýynyń tirkelýine baılanysty Qazaqstan aýmaǵynda qus eti men ónimine, saýda oryndarynda baqylaý kúsheıtildi. Veterınarlyq anyqtamalar men qujattardyń bári tekserilýde», - dedi ol.