Soltústikte 7 aýyl mektebi jabylyp qaldy
SQO bilim basqarmasy baspasóz qyzmetiniń málimetinshe, óńirde jańa oqý jylynyń aldynda 7 mektep jabyldy. Munda 1-3 oqýshydan ǵana qalǵan. Olar: Aıyrtaý aýdanynda Verhnebýrlýk eldi mekeniniń bastaýysh mektebi, Esil aýdanynda Alabıe aýylynyń bastaýysh mektebi, Maǵjan Jumabaev aýdanyndaǵy Zolotaıa Nıva negizgi mektebi, Qyzyljar aýdanynyń Novonıkolskoe bastaýysh mektebi, Jelıakov eldi mekenindegi bastaýysh mektep, Ǵabıt Músirepov aýdanyndaǵy Lıtvınovka bastaýysh mektebi jáne Taıynsha aýdanyndaǵy Krasnodolskıı bastaýysh mektebi.
Qazir SQO-da 465 mektep bolsa, sonyń 75 % - shaǵyn komplektili. Osy 351 bilim ordasynyń shamamen 160-tan astamynda bala sany talapqa saı kelmeıdi.
«QR Bilim jáne ǵylym mınıstriniń «Halyqtyń tyǵyzdyǵyna jáne eldi mekenderdiń qashyqtyǵyna qaraı bilim berý uıymdary jelisiniń kepildik berilgen memlekettik normatıvin bekitý týraly» buıryǵyna sáıkes bastaýysh mektep jasyndaǵy balalardyń sany 5 jáne odan kóp bolǵanda, memlekettik bastaýysh bilim beretin uıymnyń jumys isteýine kepildik beriledi. Al negizgi orta mektep jumys isteýi úshin bala sany 41-den asýy tıis. Jalpy orta bilim beretin mektep úshin bala sany 81-den kem bolmaýy tıis. Jabylǵan mektepterdiń oqýshylaryna odan ári oqý úshin jaqyn mańdaǵy mektepterge jetkizý uıymdastyryldy», - deıdi oblystyq bilim basqarmasynyń baspasóz hatshysy Ásel Orazbaeva.
Jalpy bıyl 306 eldi mekennen 2 785 bala jaqyn mańdaǵy aýyl mektepterine tasymaldanyp jatyr. Sonyń shamamen 1,7 myńyn kúndelikti aparyp-ákelip turý qajet. Osy maqsatqa 160-qa jýyq arnaıy avtokólik alynǵan, bıyl qatary taǵy 29 avtobýspen tolyqpaq.
SQO-da mektepter sany jyldan-jylǵa azaıyp keledi. Mamandardyń aıtýynsha, osydan 10 jyl buryn óńirde 596 jalpy bilim beretin mektep bolsa, osy aralyqta shamamen 25 % kemigen.