Soltústikke kóshkenderge arzan baǵamen úı beriledi
ASTANA. QazAqparat - Ońtústikten soltústikke kóshetinderge arzan baspana beriledi. Atalǵan bastama ázirshe pılottyq rejımde qolǵa alynyp otyr, dep xabarlaıdy QazAqparat tilshisi.
QR Eńbek jáne xalyqty áleýmettik qorǵaý vıtse-mınıstri Nurjan Áltaevtyń aıtýynsha, qazirgi kezde baspana jaldaý úshin bir jylǵa deıin aqsha beriledi. Degenmen, adamdardyń baspana máselesi túbegeıli sheshilip otyrǵan joq.
"Sol sebepti bıyl biz Soltústik Qazaqstan oblysynda pılottyq jobany bastap jatyrmyz. Ol jaqqa ońtústikten jyl saıyn myń otbasy kóship otyrady. Sol azamattar úshin jańa úıler salynady. Osy bastamaǵa bıýdjetten aqsha qarastyrylyp jatyr. Ony iske asyrý tetikterin de qarastyrýdamyz. Josparǵa sáıkes, soltústikke kóshkender úıdi jalǵa alyp, aı saıyn aqy tóleıdi. Aqynyń mólsheri kóp bolmaıdy. Úı 15 jylǵa jalǵa beriledi. Alaıda bes jyldyń ishinde ony jeke menshikke satyp alýǵa bolady", - dedi N.Áltaev Astanada ótken baspasóz máslıxatynda.
Onyń sózine qaraǵanda, atalǵan bastama sátti júzege assa, ondaı úıler Pavlodar, Qostanaı jáne Shyǵys Qazaqstan oblystarynda salynady.
"Resmı málimetke sáıkes, ótken jyly Ońtústik Qazaqstan, Jambyl, Qyzylorda, Mańǵystaý jáne Almaty oblystarynan soltústikke 1 200-den astam otbasy kóship bardy. Bıyl biz atalǵan kórsetkishti 1 706 otbasyǵa deıin arttyrýdy kózdeımiz. Ol - shamamen 7 119 adam. Osy adamdardyń bir bóligi jeke menshik kásiporyndarda eńbek etedi. Ol jerde jumys oryndary daıyn. Ekinshi bóligi bıýdjettik salaǵa barady. Óıtkeni onda da maman tapshylyǵy bar. Qalǵany bıznespen aınalysatyn bolady. Olarǵa jer de, shaǵyn nesıe de beriledi", - dep atap kórsetti N.Áltaev.
Aıta keteıik, búgingi baspasóz máslıxatynda mınıstr Ábilqasymova oralmandardyń eńbek ótilin esepteý máselesi boıynsha túsinik berdi. Onyń aıtýynsha, kelesi jyldan bastap elimizde biryńǵaı jıyntyq tólem engiziledi.
