Soltústikqazaqstandyqtardyń eńbekaqy qory 1 jylda 18 paıyzǵa artty
NUR-SULTAN. QazAqparat - Soltústikqazaqstandyqtardyń eńbekaqy qory 1 jylda 18 paıyzǵa artty. Bul týraly Soltústik Qazaqstan oblysynyń ákimi Qumar Aqsaqalov Ortalyq kommýnıkatsııalar qyzmetindegi baspasóz máslıhatynda aıtty, dep habarlaıdy QazAqparat tilshisi.
«Oblys ekonomıkasy qıyndyqtarǵa qaramastan damyp keledi. Negizgi salalar boıynsha ósim bar. Halyqtyń tabysy ósip keledi. Jalpy eńbekaqy qory ulǵaıýda. Bıyl 9 aıda barlyq soltústikqazaqstandyqtardyń eńbekaqysy 178 mlrd teńgege jetti. Byltyr osy kezeńde 151 mlrd teńge bolǵan edi. Bir jylda eńbekaqy qory 18 paıyzǵa kóbeıdi. Oblysta ortasha eńbekaqy 19 paıyzǵa ósti. Tıisinshe, zeınetaqy qoryna túsken qarjy kólemi 22 paıyzǵa ulǵaıdy. Jyl basynda 12 myń jańa jumys ornyn ashý mindeti qoıyldy, jospar oryndaldy», - dedi ol.
Onyń atap ótýinshe, óńirdegi ekonomıkanyń damyp jatqanynyń taǵy bir belgisi – salyq túsimderiniń ósýi. Byltyr oblys qazynasyna 58 mlrd teńge tússe, bıyl 67 mlrd teńgege jetpek.
«Oblys bıýdjeti byltyrǵy jylmen salystyrǵanda 323 mlrd teńgeden 393 mlrd teńgege deıin, nemese 22 paıyzǵa ósti. Sonyń arqasynda áleýmettik mańyzy bar kóptegen jobalar júzege asty. Ásirese, aýyldardyń ınfraqurylymyn jańartýǵa kóp qarjy bólindi. Bıyl 132 aýyldy jańǵyrtýǵa 22 mlrd teńge baǵyttaldy. Bul eldi-mekenderde mektepter, emdeý mekemeleri, aýyl joldary jáne sý jelileri jóndeldi», - dedi Qumar Aqsaqalov.
