Soltústikqazaqstandyqtar dala órti úshin 793 myń teńge tóledi
PETROPAVL. QazAqparat - Petropavlda tabıǵı órttiń aldyn alý jáne joıý boıynsha jedel májilis ótti, dep habarlady SQO TJD baspasóz qyzmetine silteme jasap «QazAqparat» HAA tilshisi.
SQO-da aptap ystyq aýa raıy saqtalýda. Boljam boıynsha tamyz aıy da ystyq bolady. TJ aldyn alý jáne oǵan ýaqtyly den qoıý maqsatynda SQO TJD-de oblys ákiminiń orynbasary Anton Fedıaevtiń basshylyǵymen jedel májilis ótti.
Departament bastyǵynyń orynbasary Nurlan Atyǵaev oblystyń barlyq aýdandarynda jergilikti atqarýshy organdar men memlekettik orman mekemelerimen birlesip, aýyldyq okrýgterdiń erikti órtke qarsy quramalaryn tarta otyryp, orman órtterin joıý boıynsha 16 órt-taktıkalyq jattyǵý ótkenin habarlady.
TJD, jergilikti polıtsııa qyzmeti, tabıǵı resýrstar jáne tabıǵatty paıdalanýdy retteý basqarmasynyń qyzmetkerlerinen oblystyq jáne aýdandyq jedel top quryldy. Órt qaýipti kezeńi bastalǵannan bastap 151 reıd ótti. «Dala baqylaýsyz órtengeni úshin jalpy somasy 793 myń teńgege 51 jeke jáne zańdy tulǵa ákimshilik jaýapkershilikke tartyldy», - dep atap ótti Nurlan Atyǵaev.
