Soltústikqazaqstandyqtar bıyl 6 mln astam kóshet otyrǵyzǵan
PETROPAVL. QazAqparat – Soltústik Qazaqstan oblysynda bıyl «Jasyl Qazaqstan» ulttyq jobasy aıasynda 6 mln astam aǵash otyrǵyzyldy, dep habarlaıdy QazAqparat tilshisi.
SQO tabıǵı resýrstar jáne tabıǵat paıdalanýdy retteý basqarmasynyń málimetinshe, ormanshylar oblys aýmaǵyndaǵy ormandy alqaptardyń azaıýyna jol bermeý maqsatynda jumys isteıdi. Byltyr qolǵa alynǵan orman sharýashylyǵy is-sharalarynyń nátıjesinde oblystyń ormanmen jabylǵan aýdany 2,4 myń gektarǵa ulǵaıdy jáne qazirgi ýaqytta 442,2 myń gektarǵa jetip otyr.
Memleket Basshysynyń 2 mlrd aǵash otyrǵyzý jónindegi tapsyrmasyn oryndaý maqsatynda SQO-da ormandy alqaptardy ulǵaıtýdyń keshendi jospary ázirlendi, onyń kórsetkishteri «Jasyl Qazaqstan» ulttyq jobasyna engizildi. Máselen bıyl kóktemde 837 gektar aýmaqqa 3,4 mln kóshet otyrǵyzyldy, bul jospardyń 56 %. Qazan aıynda taǵy 2,7 mln kóshetke tolyqty.
Qoldaǵy bar baılyq – jasyl jelekti órt qaýipti maýsymda aman alyp qalý úshin orman mekemeleriniń qyzmetkerleri táýlik boıy kezekshilik atqardy.
Omby, Qorǵan jáne Túmen oblystaryndaǵy áriptesterimen ózara is-qımyl josparyn bekitip, shekara mańyndaǵy aýmaqtarda birlesip jumys isteý jóninde kelisimge otyrdy.
Qazirgi ýaqytta oblystyń ormanshylary 27 órt sóndirý avtomashınasymen jabdyqtalǵan, 85 traktor, patrýldik avtomobılder jáne basqa da jabdyqtar bar. Oblystyń orman sharýashylyqtary normalar men normatıvterge sáıkes 87 % materıaldyq-tehnıkalyq jaraqtandyrylǵan.
Bıyl jergilikti bıýdjet esebinen 109 mln teńgege 9 traktor men tirkeme satyp alyndy.
