Soltústikqazaqstandyqtar 200 mln teńge aıyppul tólegen
PETROPAVL. QazAqparat - Soltústikqazaqstandyqtar túrli ereje buzǵany úshin jyldyń basynan beri 200 mln teńge tólegen, dep habarlaıdy «QazAqparat» HAA tilshisi SQO ІІD baspasóz qyzmetine silteme jasap.
Polıtseıler ótken jylmen salystyrǵanda, óńir turǵyndarynyń aıyppuldary ýaqytyly tólenip jatqandyǵyn atap ótti. «Óńirlik jeke sot oryndaýshylarymen, «Qazaqtelekom» AQ jáne «Qazposhta» AQ-men jumystar uıymdastyryldy. Jol-patrýldik polıtseıleri men ákimshilik tájirıbe ınspektorlary quqyq buzýshylardyń aıyppuldy sol jerde tóleýine múmkindik beretin jyljymaly banktik POS-termınaldar qoldanýda. Termınaldardyń kómegimen búginde 2 myń operatsııa júrgizilip, 12 mıllıon teńge óndirildi», - dep atap ótti oblystyq ІІD bastyǵynyń orynbasary Qaırat Orazalın.
Іshki ister departamenti tólenbegen aıyppuldary bar adamdarǵa SMS-habarlama kómegimen qulaqtandyrý máselesin kóterdi. Uıaly baılanys operatorlarynyń biri osy tetikti iske qosty. Sáýir aıynan beri tólenbegen aıyppuldary týraly habarlamany 15 myń azamat alǵan.
