Soltústikqazaqstandyq soǵys ardageri búgin 100 jasqa toldy
Ǵasyr jasaǵan ardagerdi mereıtoıymen jáne Jeńis merekesimen týǵan-týystary, aýyldastary jáne oblys ákimi Qumar Aqsaqalovtyń atynan Memlekettik eńbek ınspektsııasy basqarmasynyń basshysy Qaırat Pishembaev quttyqtady.
Aýsaǵıt Muqashev 1919 jyly 9 mamyrda Omby oblysynyń Shubarkól aýdanynda dúnıege kelgen. 1939 jyly ásker qataryna alynyp, 66-artıllerııalyq oqý polkiniń kýrsanty bolady. Soǵys bastalǵanda 191-atqyshtar polkiniń tankiler rotasynda maıdanǵa attanady. «Eýropaǵa deıin jettim. Alaıda Berlınge az ǵana qalǵanda Kenıgsberg túbinde aýyr jaraqat aldym», - dep eske aldy ardager. Basy men aıaǵynan jaralanǵan jaýynger jeńisti Varshavadaǵy gospıtalde qarsy alǵan eken.
«Túngi on ekiler shamasy bolatyn. Bir kezde gospıtal basshysynyń «Jeńis! Jeńis!» degen qatty daýysy shyqty. Sol jerde jatqan bárimiz, biriniń qoly joq, endi biri aıaqsyz, taǵy bireýi gıpste - esimiz shyǵyp, dalaǵa umtyldyq. Qýanyshtan jylap, bir-birimizdi qushaqtap abyr-sabyr boldyq. Jeńis túni meniń esimde osylaı qaldy», - deıdi soǵys ardageri Aýsaǵıt ata.
Soǵystan keıin ol týǵan jerine oralady. Kolhozdyń malyn baǵady, úılenedi.
1968 jyly Qazaqstanǵa, burynǵy Qyzyltý, qazirgi Ýálıhanov aýdanyna qonys aýdarady. Jergilikti mılıtsııa bólimshesine kúzetshi bolyp ornalasyp, sol jerden zeınet demalysyna shyqty.
«ІІ dárejeli Uly Otan soǵysy», «Marshal Jýkov» ordenderiniń, «Germanııany jeńgeni úshin», «Erligi úshin» medaldarynyń ıegeri. Aýsaǵıt ata búginde 7 balasynan 23 nemere, 49 shóbere súıip otyr. Odan taraǵan urpaq Batyr atalaryn maqtan tutady.
