Soltústikqazaqstandyq sheber kitap tigýdi kásipke aınaldyrdy
PETROPAVL. QazAqparat - Ǵabıt Músirepov aýdanynyń turǵyny Evgenııa Marınıch jumsaq kıiz ben túrli matadan balalarǵa arnalǵan kitaptar tigedi, dep habarlaıdy QazAqparat tilshisi.
Evgenııa Marınıchtiń alǵan bilimi týrızm salasymen baılanysty. Joǵary oqý ornyn bitirgen boıjetken turmysqa shyǵyp, sábıli bolǵan soń, mamandyǵy boıynsha jumys istemepti. Eki balamen dekrettik demalysta otyrǵanyna bıyl besinshi jyl.
"Kishkentaıym týǵasyn is tigetin mashına satyp aldym. Úıde anam da, eki ápkem de ismer. Men de basqa qolónershiler sııaqty eń aldymen qyzdaryma túrli oıynshyqtar tigýden bastadym. Kishkentaı qyzymnyń tili kesh shyqty. Balamdy damytý úshin arnaıy kitap tigip berdim. Qolynan tastamaı oınaıdy", - deıdi Evgenııa.
Sheberdiń aıtýynsha, mundaı kitaptarmen bala oınap qana qoımaı, usaq motorıkany damytady, oılaý, qııaldaýǵa, yjdahattylyqpen isteýge úırenedi. Óıtkeni bir kitapta ǵana eń keminde 100-den astam usaq bólshegi bar.
"Kitap alty betten turady. Ol - qýyrshaqtyń úıi dep aıtýǵa bolady. Birinshi beti, mysaly ashana, sondaı aq jýyný, uıyqtaıtyn bólme, kıim-keshek turatyn bólmeler bar. Ár bólmeniń óz zattary bar. Oınap otyrǵan bala qýyrshaqty kıindiredi, tamaqtandyrady, uıyqtatady", - deıdi sheber.
Evgenııa Marınıchtiń aıtýynsha, elimizde kásiptiń bul túri ázirshe damymaǵan. Sanaýly adam ǵana aınalysady. Onyń bir sebebi - usaq-túıek jumysynyń kóptiginde. Sondaı-aq, kerekti materıaldar qymbat. Saldarynan bir daıyn buıymnyń quny orta eseppen 8-9 myń teńgege deıin shyǵady eken.
Dekrettik demalysta otyrǵan kelinshek endi óz kásibin ashyp, úıde otyryp jumys istemek. Oılana kele súıikti isin damytpaq bolyp sheshipti. "Bastaý" memlekettik baǵdarlamasy arqyly kásipkerliktiń qyr-syryn meńgergen ol, jaqynda 100 AEK mólsherinde grant almaqshy.
