Soltústikqazaqstandyq sharýalar 1 mıllıon tonnaǵa jýyq maıly daqyl jınady
PETROPAVL. QazAqparat - Soltústik Qazaqstan oblysynda maıly daqyldardy jınaý naýqany aıaqtalýǵa jaqyn. Óńirdegi 13 aýdannyń 5-eýi aýa raıynyń qolaısyzdyǵyna baılanysty kúnbaǵysty tolyq jınaı almaı otyr, dep habarlaıdy QazAqparat tilshisi.
SQO ákimdiginiń otyrysynda maıly daqyldardy jınaý naýqanynyń qorytyndylary shyǵaryldy. Soltústik óńir egistik alqaptaryn ártaraptandyrýda kósh bastap keledi. Bıyl dıqandar 1 mln jýyq gektarǵa maıly daqyldar ekti. Bul ótken jylmen salystyrǵanda 34 paıyzǵa artyq.
Oblystyq aýyl sharýashylyǵy basqarmasynyń málimeti boıynsha, byltyr óńir dıqandary kúzgi naýqanda 715 myń tonna maıly daqyl jınasa, bıyl 932 myń tonnasyn qambaǵa quıdy. Gektar berekeligi 10 tsentnerge deıin jetip otyr. 5 aýdannyń 20 shaqty sharýashylyǵy aýa raıynyń qolaısyzdyǵyna baılanysty shamamen 40 myń gektardaı kúnbaǵys alqaptaryn jınaı almaı otyr.
Raps, zyǵyr jáne kúnbaǵys ósirý - joǵary tabysty bıznes. Suranys joǵary, baǵasy da bıdaıǵa qaraǵanda eki ese qymbat. Sondaı-aq, bıyl maıly daqyldardyń baǵasy ósti. Rapstyń tonnasy byltyr 127 myń teńge bolsa, bıyl 133 myń teńgege jetti. Bir tonna zyǵyr úshin 105 myń teńge suraıdy, bul byltyrǵy jylmen salystyrǵanda 15 myń teńgege qymbat. Kúnbaǵystyń baǵasy 110 myńnan 115 myń teńgege deıin jetti. Bul ishki naryqtaǵy quny, eksporttyq baǵa odan da joǵary.
«Egistik alqaptaryn ártaraptandyrý baǵyty durys. Bıyl maıly daqyldar alqaptaryn 976 myń gektarǵa deıin jetkizdik. Jaqsy ónim jınadyq. Maıly daqyldardyń baǵasy ósti. Tıisinshe, túsim men eńbek ónimdiligi artady. Maıly daqyldar bıdaıǵa qaraǵanda 2,5 esege qymbat», - dedi SQO ákimi Qumar Aqsaqalov.
Óńir basshysy aýdan ákimderine sharýashylyqtardyń maıly daqyldardy jınaý naýqanyn jýyq arada aıaqtaýlaryn qatań baqylaýda ustaýdy tapsyrdy.
