Soltústikqazaqstandyq ónim halyqaralyq «WorldFood Moscow» kórmesinde joǵary baǵaǵa ıe boldy
PETROPAVL. QazAqparat – Soltústik Qazaqstan oblysyndaǵy et ónimderin shyǵaratyn kásiporyn Máskeýden, 65 el qatysqan kórme-baıqaýdan úsh altyn medal ákeldi, dep habarlaıdy QazAqparat tilshisi.
SQO Kásipkerler palatasy baspasóz qyzmetiniń málimetinshe, «Kazmıasoprodýkt» kásipornynyń óńirde jumys istep jatqanyna 14 jyl. 130-dan astam túrli et ónimderin shyǵarady. Olardyń shujyqtaryn jergilikti saýda oryndarymen qatar elimizdiń qalalary, Reseıdiń birneshe oblysy saýdalaıdy.
Soltústikqazaqstandyq kásiporyn saýda kókjıegin keńeıtý maqsatynda Máskeýde ótken 28-halyqaralyq «WorldFood Moscow» azyq-túlik kórmesine qatysty.
«Bizge kórmege qatysýǵa usynys tústi. Talaptarymen tanysa kele dám tatyrý bólimin tańdadyq. «Et ónimderi jáne konserviler» bóliminde bizge álemniń 35 kompanııasy báseke boldy. Biz úsh nomınatsııaǵa usynys berdik. Birinshi kúni ónimimiz zerthanada synaqtan ótti. Keıin arnaıy komıssııa sarapshylary dámin kórdi», - deıdi kásiporynnyń bas tehnology ıÝlııa Goncharova.
Kórmege álemniń 65 eli 584 túrli ónimin qoıdy. Joǵary básekege qaramastan Soltústik Qazaqstannan aparǵan úsh ónim de baıqaýdyń qorytyndysy boıynsha altyn medalǵa ıe boldy.
«Joǵary baǵalanatynyna sendik, biraq úsh birdeı altyn alamyz dep oılaǵanymyz joq. Bizdiń barlyq ónimderimiz talapqa saı ázirlenedi. Arnaıy dámdeýishterdi kóp qosyp, almastyratyn bolsaq tekseristen ótpes edi. Biraq biz baıqaýǵa dep shujyqtardy arnaıy ázirlegenimiz joq, bárin sóreden aldyq», - deıdi JShS dırektory Serik Іlııasov.
Kásiporyn bir aıda 100 tonna ónim shyǵaryp, ol Petropavldaǵy fırmalyq 9 dúkende jáne saýda oryndarynda satylady. Nur-Sultan qalasynda JShS-niń arnaıy dúkeni bar. Reseıde de ónimge suranys joǵary. Barnaýyldyń kásipkerleri qazaqstandyq shujyqty kelip áketedi eken. Halyqaralyq kórmeden keıin kásiporynnyń tutynýshylary kóbeımek.
«Reseıdiń Ekaterınbýrg, Sankt-Peterbor jáne Máskeý qalalarynyń ókilderimen qazir kelissózder júrip jatyr. Bizdiń ónim unap, endi áriptes bolmaq. Qazir bizdiń mamanymyz Máskeý qalasynda aldyn-ala kelisimge qol qoıyp jatyr», - deıdi Serik Іlııasov.
Soltústikqazaqstandyq kásiporyn aldaǵy aptada Nur-Sultan qalasynda ótetin «Qazaqstannyń úzdik taýary» kórmesine qatyspaq.
