Soltústikqazaqstandyq fermer jumysshylaryna úı salyp jatyr
PETROPAVL. QazAqparat - Soltústik Qazaqstan oblysy Shal aqyn aýdanynyń 500-ge jýyq turǵyny bar Mergen aýylynda fermerler áleýmettik ınfraqurylymdy damytyp jatyr, dep habarlaıdy QazAqparat tilshisi.
Óńirlik kommýnıkatsııalar qyzmetinen taralǵan habarlarǵa qaraǵanda, Okýnevter otbasynyń «Germes Agro» JShS jáne «Okýnev» sharýa qojalyǵy óz jumysshylaryna arnap úıler salyp jatyr. Byltyr 4 úı paıdalanýǵa berilgen. Qurylysqa ár kásiporyn 7 mıllıon teńgeden qarjy bólgen.
«Baspana alýdyń basty sharty - eńbek ótili. 2017 jyly mehanızatorlar, malshylar, qyrman jumysshylary baspanaly boldy. Bıyl 5 úıdiń irgesi qalandy. Kúzge qaraı esik-terezesin salyp, ishin árleımiz. Keleshekte taǵy da osyndaı úılerdi salýdy josparlap otyrmyz», - deıdi sharýa qojalyǵynyń basshysy Vıktor Okýnev.
Onyń sózine qaraǵanda, jumysshy zeınetke shyqqan soń, úı oǵan syı retinde qala beredi. Agrokeshende barlyǵy 50 adam jumys isteıdi.
Fermer aýyl mektebine járdem berip, joldardy jóndeýge, kóshege jaryq ornatýǵa atsalysyp júr.
Eki jyl buryn Mergen aýylynda aýylsharýashylyq kooperatıvi ashylǵan. Onda 65 adam jumys isteıdi. Mal tegin jaıylady, bir lıtr súttiń baǵasy - 85 teńge. Kooperatıv tóraǵasy Maksım Tımofeevtiń aıtýynsha, bul oblystaǵy kooperatıvterdiń arasyndaǵy eń joǵary baǵalardyń biri. Sút Petropavldaǵy «Maslo-Del» JShS-ine jóneltiledi. Táýligine 4 tonna sút jınalady.
«Ekinshi baǵyt - et. Qazir kishigirim bordaqylaý alańdarynda jıyrmaǵa jýyq ógiz baǵyp jatyrmyz. Ónimdi eńbekpen qamtý jáne jappaı kásipkerlik aıasynda 10 otbasy nesıe aldy. Ortasha bir jarym-eki mıllıonnan. Ol qarjyǵa mal satyp aldy. Bastysy - adamdardyń mal sharýashylyǵyna qyzyǵýshylyq tanytyp jatqany», - deıdi M. Tımofeev.
Bıyl tushpara tsehy ashyldy. Onyń ónimderi oblystyń úsh aýdanyna satylyp jatyr.
