Soltústikqazaqstandyq fermer qymyzdyń jeti túrin daıyndaıdy
Qazaqtyń ulttyq sýsynyn daıyndaý tehnologııasy boıynsha mundaǵy fermerler eski dástúrden aýytqymaǵan. «Azamat» fermerlik sharýashylyǵy eshqandaı avtomattandyrylǵan óndiriske den qoımapty. Bári de qoldan daıyndalady. Qymyzdyń qalaı jasalatyny týraly QazAqparat tilshisine fermerlik sharýashylyqtyń basshysy Aman Ýboldın aıtyp berdi.
«Arnaıy ydys - sabaǵa ashytqyny, keıin qymyzdyń ózin quıamyz. Sýsyn ábden dám úıirerlik bolyp shyǵýy úshin ony árbir jarty saǵat saıyn pisip otyrý kerek. 6-8 saǵattan keıin qymyzymyz daıyn bolady. Osydan keıin ony salqyn jerde saqtaý kerek. Qatyratyn tońazytqyshta eshqashan saqtaýǵa bolmaıdy», - deıdi fermer.
Ashytqy retinde aıran, qazy men ashytqy qoldanylady. Qymyzdy neǵurlym kóp pisken saıyn soǵyrlym dámdi bolyp shyǵady.
Qymyz festıvalinde fermerlik sharýashylyq qymyzdyń jeti túrin usyndy. Atap aıtqanda, bal qymyz, dónen qymyz, jýas qymyz, qunan qymyz, túneme qymyz boldy. Olardyń árbir túriniń ózindik aıshyqty dámi bar. Bal qymyzdyń quramyna bal, órik pen júzim qosylady. Sýsyn mundaıda táttirek bolyp shyǵady. Qunan qymyz eki kún saqtalady. Jýas qymyzǵa jańa saýylǵan sıyrdyń súti aralastyrylady. Al dónen qymyzdan saýylǵannan keıin úsh kúnnen soń ǵana dám tata alasyz. Túneme qymyz - jeti kún saqtalǵan sýsyn. Onyń dámi qyshqyldaý keledi.
«Qymyz týberkýlezge shaldyqqan adam úshin taptyrmas sýsyn, ol qan tamyrlaryn keńeıtedi. Bir kúngi qymyz bala emizip otyrǵan anaǵa paıdaly. Naǵyz qymyzdy biletin adamdar dámin tatpaı túrinen tanıdy. Eger qymyzǵa sý qosylsa, ol qatparlanyp, qaımaqtary jınalyp, úlpekter paıda bolady. Álbette, dáminen de qymyzdy tanýǵa bolady», - deıdi ol.
Ótken jyly «Azamat» fermerlik sharýashylyǵy «Bıznestiń jol kartasy - 2020» memlekettik baǵdarlamasy boıynsha eki mıllıon teńge nesıe alǵan. Qazirgi ýaqytta sharýa qojalyǵynyń 10 bıesi bar. Qymyz Ýálıhan aýdanynyń dúkenderinde satylady. Tipti Reseıden de tapsyrys túsedi eken. Fermerdiń aıtýynsha, Ombyda «Azamattyń» qymyzyn kóptep suratady.
