Soltústikqazaqstandyq eki kásipker «Jomart júrek» syılyǵyn aldy
«Jomart júrek» syılyǵy - Qoǵamdyq damý mınıstrliginiń «Rýhanı jańǵyrý» baǵdarlamasynyń «Atameken» kishi baǵdarlamasy sheńberinde uıymdastyryp otyrǵan biregeı jobasy. Syılyq týǵan ólkeniń damýyna eleýli úles qosqan metsenattarǵa, belsendi tulǵalarǵa, bıznes-qurylym ókilderine, eriktiler men túrli uıymdarǵa tabystalady. Jeńimpazdar «Jyl metsenaty», «Jyl tulǵasy», «Úzdik uıym», «Eren eriktilik», «Týǵan ólke» atalymdary boıynsha marapattaldy.
M.Jumabaev aýdanyndaǵy «Noǵaıbaı» JShS-niń dırektory Altynbek Saparov «Jyl metsenaty» dep tanyldy. Aýyl sharýashylyǵymen aınalysatyn seriktestik 1995 jyly qurylǵan bolatyn. Kásipker óz sharýashylyǵyn ǵana «dóńgeletip» qoımaı, aýyl turǵyndarynyń áleýmettik jaǵdaıyn da nazardan tys qaldyrmaıdy. Aýylda taza sý ár úıge kirgen, kósheler asfalttalǵan. Sondaı-aq túngi ýaqytta eldimeken samaladaı jarqyrap turady.
2016 jyly aýylda 200 oryndyq akt zaly, kitaphanasy bar demalys ortalyǵy ashyldy. Sport alańdary jumys istep tur. 2017 jyly seriktestik jańadan 5 turǵyn úıdi paıdalanýǵa berse, bıyl 28 mln teńgege taǵy 4 úıdiń qurylysy júrip jatyr. Jaqynda jańadan salynǵan feldsherlik-akýsherlik pýnkt paıdalanýǵa berilmek.
Al Aqqaıyń aýdanyndaǵy «Daıyndyq -Agro» JShS-niń dırektory Birjan Shaımerdenov «Jyl tulǵasy» atandy. Ol basqaryp otyrǵan sharýashylyq óńirdegi úzdik seriktestikterdiń biri. Eginshilikpen qatar mal sharýashylyǵyn da damytyp otyr. Kópsalaly óndiristiń nátıjesinde turǵyndar jyl on eki aı jumyspen qamtylǵan. Birjan Ábdilmanuly aýylynyń áleýmettik salasyn damytýdy da umytpaıdy. Seriktestik esebinen turǵyn úıler salynyp jatyr, al baspanalar ortalyqtandyrylǵan jylytý júıesine qosylǵan.
Bıyl elimizdiń 735 metsenaty 35 mlrd teńgeniń kómegin kórsetken. Bul qarajatqa medıtsınalyq, bilim mekemeleri, sporttyq ortalyqtar salynyp, jóndeldi. Áleýmettik mańyzy bar jobalar qarjylandyrylǵan.