Soltústikqazaqstandyq dıqandar 5,3 mln tonna astyq aldy
PETROPAVL. QazAqparat - Soltústikqazaqstandyq dıqandar egin oraǵyn aıaqtap, 5,3 mln tonna astyqty qambaǵa quıdy. Bıyl sharýalar ár gektardan 19 tsentnerden ónim alyp otyr, dep habarlaıdy QazAqparat.
Oblys ákimi baspasóz qyzmetiniń málimetinshe, byltyrǵy jyly ár gektardan 18,2 tsentnerden ónim alynǵan bolatyn. Ónimdiliktiń artýy - dıqandardyń tynymsyz eńbegi men memlekettik qoldaýdyń zańdy nátıjesi.
Oblysta kartop pen kókónisterdi jınaý naýqany da támamdaldy. Bıyl kartop alqaptary 27 myńnan 37 myń gektarǵa deıin ulǵaıtyldy. Sondaı-aq, óńirde bıyl kartop bitik shyqty, nátıjesinde, 588 myń tonna ónim jınaldy. Ótken jylmen salystyrǵanda ónim kólemi 18 paıyzǵa artyp otyr. Budan basqa 110 myń tonna kókónis jınaldy. Bul sharalar óńirde azyq-túlik qaýipsizdigin qamtamasyz etip, kartop pen kókónis baǵasynyń negizsiz ósýine jol bermeýge baǵyttalyp otyr.
Jalpy, oblysta kúzgi aýylsharýashylyǵy jumystary bıyl josparǵa saı atqaryldy. Tórt túlik qystan kóterem shyqpaýy úshin 1 mln 100 myń tonna shóp, 194 myń tonna pishen jáne 1 mln 600 myń tonna saban ázirlendi.
Aqerke Qabykeeva
