Soltústikqazaqstandyq bıdaıǵa suranys artty
PETROPAVL. QazAqparat - Bıyl soltústikqazaqstandyq bıdaıdyń 2,9 mln tonnasy shetelge eksporttaldy. Jaqynda taǵy 713 myń tonna astyq shekara aspaq, dep habarlaıdy QazAqparat.
«Azyq-túlik kelisim shart korporatsııasy» SQO ókildiginiń málimetinshe, bıdaı eksporttalatyn elderdiń qatarynda Ózbekstan, Tájikstan, Aýǵanstan jáne Iran bar. Bıyl olarǵa Ázerbaıjan men Túrikmenstan qosyldy. Bul eki memleket buǵan deıin astyqty Reseıden satyp alyp kelgen. Jańa bıdaıdyń sapasy byltyrǵa qaraǵanda joǵary bolǵandyqtan shet memleketterden suranys túsip jatyr.
Búgingi tańda elevatorlarǵa 1,5 mln tonna dán quıyldy. Olardy óńdeýmen 45 kásiporyn aınalysady. Bıyl bıdaıdy tasymaldaýda vagondar jetispeýshiligi de bolmaıdy. Óıtkeni jýyrda ǵana osy máselege qatysty «QTJ» AQ men oblystyq ákimdik memorandým jasasty.
«Byltyrǵa qaraǵanda eki ese kóp bıdaı temirjolmen tasymaldanatyn bolady. Oblysqa qansha vagon kerek, sonshasyn taýyp beremiz dep otyr. Ázirshe, 100 vagon óńirge bekitildi»,- deıdi «Azyq-túlik kelisim shart korporatsııasy» UK» AQ SQO ókildiginiń dırektory Ramazan Ásip.
Budan buryn habarlanǵandaı, elimizde bıdaı baǵasy kóterilgen bolatyn. 3-klasty bıdaıdyń baǵasy 12 myń teńgege qymbattady. ıAǵnı, QQS tóleýshiler úshin 54 myń teńge dep bekitildi. Bul óz kezeginde óńir agrarshylary úshin tıimdi, óıtkeni aýyl sharýashylyǵynda eńbek etetinderdiń tabysy artyp, ónimdilik kólemi ulǵaıady.
