Soltústikqazaqstandyq 200 dáriger shetelge oqýǵa jiberiledi
PETROPAVL. QazAqparat - Soltústik Qazaqstan oblysynyń ákimi Qumar Aqsaqalov óńir dárigerlerin kásibı merekelerimen quttyqtady, dep habarlaıdy QazAqparat tilshisi.
SQO ákimi baspasóz qyzmetiniń habarlaýynsha, óńir basshysy Qumar Aqsaqalov medıtsına qyzmetkerlerimen kezdesý barysynda sala boıynsha atqarylyp jatqan jumystarmen tanystyrdy. Máselen sońǵy jyldary densaýlyq saqtaýǵa bólingen qarjy 55% ósti, medıtsınalyq qondyrǵylardy satyp alýǵa beriletin soma 2 ese ulǵaıdy. Jaqynda jańa tehnıka, zamanaýı qondyrǵylar satyp alynyp, 14 emdeý mekemesi kúrdeli jóndelmek.
«Sapaly ári tıimdi jumys isteý úshin emdeý mekemeleriniń materıaldy-tehnıkalyq bazasyn jaqsartýymyz qajet. Qyrkúıek aıynda magnıtti rezonanstyq tomografııa jáne angıograf qondyrǵylary alynady. Maýsymda kompıýterlik tomograf pen tsıfrlyq mammograf keledi. Aýdandarǵa 700 mln teńgege 25 qondyrǵy satyp alynady», - dedi Qumar Aqsaqalov.
Sondaı-aq aımaq basshysy medıtsına qyzmetkerlerine jaǵymdy jańalyq jetkizdi.
«Qyrkúıekte Petropavlda kópsalaly aýrýhananyń qurylysy bastalady. Biz osy jobaǵa bir jyl jumsadyq. Bul túrik kompanııasymen júzege asatyn eń aýqymdy joba. Eki jylda aýrýhana salynady. Óńir turǵyndarymen qosa, kórshiles oblystar men Reseıdiń azamattary da emdele alady. Úzdik qondyrǵylarda úzdik dárigerler jumys istemek. Osy maqsatta shetelge 200 dárigerdi oqýǵa jiberemiz», - dedi ol.
Saltanatty jıyn barysynda óńir basshysy eńbegi sińgen dárigerlerge «Densaýlyq saqtaý salasynyń úzdigi» tósbelgisin jáne Alǵys hattardy tabys etti.
