Soltústik teńizdegi kúshti jel áskerı júk tıelgen dat kemesindegi órtten ekıpajdy qutqarýǵa kedergi jasaýda
ASTANA. 17 qarasha. QazAqparat - Soltústik teńizdiń Norvegııa jaǵalaýynda dat júk kemesinde órt shyqty, ot qursaýynda 32 ekıpaj múshesi qalyp otyr, dep habarlady RBK.
Norvegııalyq úsh tikushaq oqıǵa ornyna ushyp shyqty, biraq ta qutqarý jumystaryna kúshti jel kedergi jasaýda.
Norvegııanyń birikken úılestirýshi qutqarý ortalyǵynyń basshysy Per Feld ekıpaj ómirine qaýip joq ekenin habarlady: órt oshaǵy aýyzdyqtaldy jáne kemede odan ári jaıylýyna toqtaý salyndy, biraq ta ony tolyq óshirý múmkin bolmaı otyr.
Qazirgi kezde Soltústik teńizdegi uıtqyǵan jeldiń ekpini saǵatyna 180 shaqyrymǵa jetip, tolqyn bıiktigi 15 metrge deıin kóterildi.
DFDS dat kompanııasynyń ıeligindegi 11 myń tonnaǵa deıin júk kóteretin Britannia Seaways kemesi norvegııalyq Flýre qalasynan 130 shaqyrym jerde órtendi. Onyń bortynda áskerı júk bar. Keme Norvegııanyń soltústik bóliginen Bergenge baǵyttalyp shyqqan bolatyn.
