Soltústik pen shyǵysty gazdandyrýda Reseımen kelissóz jalǵasýda – mınıstr

ASTANA. QazAqparat – Elimizdiń soltústik jáne shyǵys aımaqtaryna gaz jetkizý boıynsha Reseımen kelissóz jalǵasyp jatyr. Bul týraly QR Energetıka mınıstri Bolat Aqsholaqov málim etti, dep habarlaıdy QazAqparat tilshisi.

«Tehnıkalyq turǵydan alǵanda, eldiń soltústik-shyǵysy men shyǵysyn gazdandyrý úshin jylyna shamamen 10 mıllıard tekshe metr gaz jetkizýge múmkindik beretin qubyr qajet. Eger qosymsha ońtústikke jetkizý qyzyǵýshylyǵy týyndasa, onda 20-30 mıllıard tekshe metrden astam gaz qajet. Biraq bul kelissóz barysynda qaralatyn jaıt», - dedi Bolat Aqsholaqov Ortalyq kommýnıkatsııalar qyzmeti alańynda ótken baspasóz máslıhatynda.

Mınıstrdiń aıtýynsha, elimizdiń soltústik-shyǵys jáne shyǵys oblystaryn gazdandyrýdyń birneshe joly bar.

«Aıtar bolsaq, Barnaýyl gaz qubyry arqyly respýblıkanyń soltústigi odan ári Pavlodar, Óskemen, Semeı jáne oǵan jaqyn aýdandarǵa kógildir otyn jetkizýge bolady. Sonymen qatar gaz qubyryn tranzıt úshin paıdalaný múmkindigi bar. Biraq kelissózder áli aıaqtalǵan joq», - deıdi ol.

Buǵan deıin Energetıka mınıstri Bolat Aqsholaqov elimizdiń soltústigi men shyǵysyn gazdandyrýdyń eń ońtaıly nusqasy - gazdy Reseıden tartý degen edi.

Eske sala keteıik, bıyl qarashada Qazaqstan men Reseı prezıdentteri Kremlde «úshtik gaz odaǵyn» qurý máselesin talqylady.