Soltústik óńirlerge 665 otbasyn kóshirý kózdelip otyr - OQO
ShYMKENT. QazAqparat - Ońtústik Qazaqstan oblysy ákimdiginiń uıymdastyrýymen Shymkent qalasy men Saıram aýdanynda ishki kóshi-qon jáne qonystandyrý máselesine baılanysty jármeńke ótkizildi.
Onda ózge óńirlerden kelgen delegattar bos jumys oryndaryn usynyp, ońtústikqazaqstandyqtardy elimizdiń soltústik aımaqtaryna qonys aýdarýǵa shaqyrdy, dep habarlaıdy OQO ákiminiń baspasóz qyzmeti
Ondaǵy maqsat - Elbasynyń tapsyrmasyna sáıkes elimizdegi ishki kóshi-qon protsesterin retteý jáne eńbek resýrstarynyń teńgerimdiligin arttyrý, halyqty birkelki jaıǵastyrý, eńbek kúshi mol aımaqtan, eńbek kúshi jetispeıtin óńirlerge halyqty óz erikterimen qonystandyrý.
Shara barysynda Soltústik Qazaqstan, Pavlodar, Qostanaı jáne Shyǵys Qazaqstan oblystarynan kelgen qonaqtar halyqqa júzdegen bos jumys oryndaryn usyndy. Olardyń qatarynda memlekettik qyzmetten bastap bilim, aýyl sharýashylyǵy jáne áleýmettik salalar bar. Sondaı-aq, jeke kásip ashyp, bıznespen aınalysqysy keletin azamattarǵa memleket tarapynan turǵyn úı, jer, áleýmettik paket berilip, ákimdiktiń turaqty baqylaýynda bolatyny aıtyldy.
Ońtústik Qazaqstan oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy M.Otarshıev óz sózinde atqarylyp jatqan sharalardy turǵyndar oń baǵalap, nátıjesinde qonys aýdaratyndardyń qatary artyp kele jatqanyn aıtty.
«Halqy tyǵyz ornalasqan aýdandarda júrgizilgen aqparattyq-túsindirý jumystarynyń nátıjesinde atalǵan oblystarǵa kóshýge nıet bildirgender barshylyq. Máselen, 2015-2017 jyldary 1392 múshesi bar 347 otbasy soltústik óńirderge qonys aýdardy. Kóship barǵan árbir januıanyń keminde bir adamy jumyspen qamtylyp, túrli salada jemisti jumystar atqaryp keledi. Al, bıyl 665 otbasy qonys aýdarady dep josparlanýda», - dedi Muhıt Otarshıev.
Búginde Úkimet tarapynan qonys aýdarýshylarǵa jaǵdaı jasaý úshin zańnamalarǵa ózgerister engizilgen. Atap aıtqanda, soltústik aımaqtarǵa kóshý úshin otbasynyń árbir múshesine 84175 teńge mólsherinde qarjylaı kómek beriledi. Bir jyl boıy úıdi jalǵa alý jáne kommýnaldyq qyzmetterge aqy tóleý úshin 72150 teńgege deıin qarjy tólenedi. Sondaı-aq, jańa jumys ornyn ashyp, 5 qonys aýdarýshyny 3 jyl merzimge turaqty jumyspen qamtyǵan azamatqa árbir jumysker úshin 1082250 teńge sýbsıdııa qaralǵan.
