Soltústik óńirlerde aqpan jáne naýryz aılarynda qalyń qar jaýýy múmkin - QR Tótenshe jaǵdaılar mınıstri
ASTANA 19 aqpan. QazAqparat - Tapsyrmaǵa sáıkes 24 qańtarda oblys máslıhattary tasqynǵa qarsy is-sharalarǵa arnalǵan bıýdjetti bıyl 5,4 mıllıardtan 14 mıllıard teńgege deıin ulǵaıtty.
Bul týraly búgin selektorlyq tártiptegi Úkimet otyrysynda QR Tótenshe jaǵdaılar mınıstri Vladımır Bojko málim etti.
«Bul rette BQO-nyń tótenshe jaǵdaılarǵa arnalǵan bıýdjettik baby 19 esege, Astana qalasynda - 15 esege, Qostanaı oblysynda - 11 esege, OQO-da - 5 esege ósti. Budan bólek Aqtóbe, Shyǵys Qazaqstan, Pavlodar, Soltústik Qazaqstan oblystary ózderiniń bıýdjetinen qosymsha qarjy bólmedi. Bul qalyptasyp otyrǵan jaǵdaıda tasqynǵa ýaqytyly áser etý sharalarynyń tıimdiligin tómendetýi múmkin», - dedi mınıstr.
Sóz sońynda ol Soltústik óńirlerde aqpan jáne naýryz aılarynda qalyń qar jaýýy múmkin ekendigin eskertip ótti. «Sondyqtan bul jaǵdaı odan ári qıyndaıtynyn atap aıtqym keledi», - dep túıdi V. Bojko.
