Soltústik oblystardan basqa óńirlerge 268 myń tonna astyq tasyldy
TANA. 10 qazan. QazAqparat /Qanat Mámetqazyuly/ - Astyǵy mol jınalǵan elimizdiń egindi soltústik oblystarynan basqa óńirlerge 268 myń tonna bıdaı tasymaldandy.
Bul tasymaldaýy josparlanǵan bıdaı kóleminiń 54 paıyzyn quraıdy. Búgin QR Parlamenti Májilisinde «Astyq salasy: jaǵdaıy men perspektıvalary» atty taqyrypta ótken Úkimet saǵatynda Aýyl sharýashylyǵy mınıstri Asyljan Mamytbekov osylaı aıtty.
Málimetterge qaraǵanda, astyqty óńirlerdiń elevatorlyq syıymdylyǵyn bosatý úshin Azyq-túlik korporatsııasymen 500 myń tonna bıdaıdy basqa óńirlerge tasymaldaý týraly sheshim qabyldanǵan. Onyń ishinde Aqmola oblysynan - 151, 4 myń tonna, Qostanaı oblysynan - 165,5 myń tonna, Soltústik Qazaqstan oblysynan - 183,2 myń tonna tasymaldaý josparlanǵan. «Osy maqsattar úshin Úkimet rezervinen 1,7 mlrd. teńge bólindi. Qazirgi tańda 268 myń tonna bıdaı tasymaldandy. Bul barlyq josparlanǵan bıdaıdyń 54 paıyzy bolyp tabylady. Astyqtyń negizgi kólemin tasymaldaýdy qazan aıynyń sońyna deıin aıaqtaý kózdeledi», - dedi A. Mamytbekov.
Mınıstrdiń aıtýynsha, memlekettik astyqtan bólek agroónerkásip kesheniniń sýbektileri de óz astyqtaryn ózge óńirlerdiń astyq qabyldaý kásiporyndaryna tasymaldaıtyn bolady. «Búgingi kúni el ishindegi osylaısha tasymaldanǵan astyqtyń mólsheri 388 myń tonnany quraıdy», - deıdi vedomstvo basshysy.
