Soltústik Makedonııamen aradaǵy kelisimder azamattar quqyqtaryn qamtamasyz etedi - Áshimbaev

NUR-SULTAN. QazAqparat – Búgin Senattyń jalpy otyrysynda izdeýde júrgen adamdardy bir-birine ustap berý jáne sottalǵan adamdardy berý týraly Soltústik Makedonııamen aradaǵy Sharttar toptamasy qaraldy. Osyǵan baılanysty Senat tóraǵasy Máýlen Áshimbaev pikir bildirdi, dep habarlaıdy QazAqparat tilshisi.

Senatorlar quqyqtyq kómek týraly mundaı kelisimder shetelde júrgen Qazaqstan azamattarynyń quqyqtaryn qorǵaý úshin mańyzdy ekenin atap ótti.

«Búgin qabyldanǵan zańdar Qazaqstan men Soltústik Makedonııa arasyndaǵy quqyq qorǵaý salasyndaǵy yntymaqtastyqty damytýǵa baǵyttalǵan. Olar qylmyskerlerdi jaýapkershilikke tartýdyń ártúrli kezeńderin qamtıdy jáne qylmyspen kúresti kúsheıtý úshin memleketaralyq qatynastardyń quqyqtyq negizderin qalyptastyrady. Soǵan sáıkes, qylmystardy tergeý protsesinde jan-jaqty kómek kórsetý, qylmyskerlerdi ustaý jáne olardy ekstradıtsııalaý, sottalǵan adamdardy berý sııaqty ózara is-áreketter qarastyrylǵan. Bul qujattar zańnyń ústemdigin qamtamasyz etedi. Sondaı-aq, azamattarymyzdyń quqyqtaryn qamtamasyz etýge múmkindik beredi», – dedi Máýlen Áshimbaev.

Qazaqstannyń quqyq qorǵaý qyzmetteriniń aqparaty boıynsha, qazirgi tańda eki el arasynda berýge jatatyn azamattar joq. Osy rette elimiz búginge deıin 30-ǵa jýyq memleketpen osyndaı shart jasasqanyn aıta ketken jón. Al qazirgi tańda shet elderde 922 qazaqstandyq jazasyn ótep jatyr.

Budan buryn habarlanǵandaı, búgin Senattyń jalpy otyrysynda «Qazaqstan Respýblıkasy men Soltústik Makedonııa Respýblıkasy arasyndaǵy adamdardy ustap berý týraly shartty ratıfıkatsııalaý týraly» jáne «Qazaqstan Respýblıkasy men Soltústik Makedonııa Respýblıkasy arasyndaǵy sottalǵan adamdardy berý týraly shartty ratıfıkatsııalaý týraly» , sondaı-aq «Qazaqstan Respýblıkasy men Soltústik Makedonııa Respýblıkasynyń arasyndaǵy qylmystyq ister boıynsha ózara quqyqtyq kómek týraly shartty ratıfıkatsııalaý týraly» zańdary qabyldandy.