Soltústik Koreıanyń ıadrolyq problemasyn retteý kelissóziniń qaıta jańǵyrýyn jaqtaımyz - Elbasy
«Qazaqstan 2017-2018 jyldary BUU Qaýipsizdik Keńesiniń turaqty emes múshesi retinde sizdermen birlese otyryp, óńirlik jne jahandyq janjaldardy sheshý úshin bar kúsh-jigerin jumsaıtyn bolady. Aýǵanstan basshylyǵynyń aýǵanishilik saıası dıalogty nyǵaıtý, eldi turaqty, damyǵan memleketke transformatsııalaý jónindegi kúsh-jigerin tolyqtaı qoldaımyz. Bul óńirdegi barlyǵymyzdyń múddemizge saı», - dedi Elbasy.
Sonymen qatar Nursultan Nazarbaev elimiz Astana protsesi alańynda sırııaaralyq daǵdarysty retteý jónindegi kelissózder úderisine óziniń zor úlesin qosyp kele jatqandyǵyn basa aıtty.
«Barlyq múddeli taraptardyń atalǵan kelissózderine jaǵdaı jasaý barynsha mańyzdy. Buǵan qosa, Qazaqstan ıadrolyq qarýsyzdaný jáne taratpaý ıdeıasyn jaqtaýshy bolyp sanalady. Osyǵan baılanysty biz Soltústik Koreıanyń ıadrolyq problemasyn retteý boıynsha kelissózderdiń tez arada qaıta jańǵyrýyn jaqtaımyz», - dep atap ótti Memleket basshysy.
QR Prezıdenti Qazaqstannyń «jasyl ekonomıkany» damytý jónindegi jahandyq kúsh-jigerge de qoldaý kórsetetindigin jetkizdi.
«Búgin barlyǵymyz «Bolashaq energııasy» uranymen «EKSPO-2017» halyqaralyq mamandandyrylǵan kórmesiniń ashylý saltanatyna qatysatyn bolamyz. Barlyqtaryńyzǵa usynysymdy qabyl alyp, atalǵan sharaǵa qatysýǵa nıet bildirgenderińiz úshin shynaıy rızashylyǵymdy bildiremin. Birneshe aı boıy osy jerde ekologııalyq taza energetıka salasyndaǵy eń aldyńǵy qatarly tehnologııalar kórsetiletin bolady. Astanada ótetin EKSPO nátıjesi ShYU-nyń barlyq memleketterine jáne tolyqtaı alǵanda halyqaralyq qoǵamdastyqqa aıtarlyqtaı paıda ákelerine úmit artamyn», - dedi Nursultan Nazarbaev.
