Soltústik Koreıany Qazaqstan tańdaǵan jolǵa túsýge ılandyrý kerek - Koreıa mınıstri
«Qazaqstan - ıadrolyq qarý-jaraqtan óz erkimen bas tartyp, beıbitshilik jolyn tańdaǵan el. Sol ýaqyttan beri el qandaı jetistikke jetkenin kórip otyrmyz. Qazaqstan tarıhyn, ásirese, bizdiń Soltústik Koreıamen aradaǵy jaǵdaıǵa baılanysty kóp aıtý qajet. Soltústik Koreıany Qazaqstan tańdaǵan jolǵa túsýge ılandyrý kerek. Muny jasaýǵa bizdiń tarıhı múmkinshiligimiz bar», - dedi ol QR Syrtqy ister mınıstri Qaırat Ábdirahmanovpen kezdesýden keıingi birlesken málimdeme barysynda.
Osy rette ol BUU Qaýipsizdik keńesiniń múshesi retinde Qazaqstan tarapynan qoldaýdyń jalǵasa beretindigine úmit artatyndyǵyn basa aıtty.
«ıAdrolyq qarýsyzdaný problemasyn sheshýge úles qosqany, qoldaý kórsetkeni úshin Qazaqstanǵa rızashylyǵymyzdy bildiremiz. Óıtkeni, ol tek bizdiń óńirge ǵana emes, sonymen birge búkil álemge de qatysty. Bizdiń maqsatymyz ortaq. Biz baǵytqa kóz salatyn seriktespiz. Halyqaralyq kún tártibindegi kóptegen saıası máselelerdi birlese sheshemiz. Dostyq pen birlesken seriktestikke negizdelgen oń ári myǵym dıalogty jalǵastyrǵymyz keledi», - dedi Koreıa Syrtqy ister mınıstri.
Aıta keterligi, birlesken málimdeme barysynda QR Syrtqy ister mınıstri Qaırat Ábdirahmanov Qazaqstan koreıaaralyq dıalogtyń qaıta qalpyna kelýin qoldaıtyndyǵyn aıtqan bolatyn.
