Soltústik Koreıa zymyran synaǵyn jalǵastyra bermek

ASTANA. QazAqparat - Soltústik Koreıa halyqaralyq qaýymdastyq tarapynan synǵa ushyrap, Amerıka Qurama Shtattarynan áskerı qysymnyń kúsheıgenine qaramastan zymyran synaǵyn jalǵastyra bermek. Bul týraly BBC News-ke bergen suhbatynda KHDR syrtqy ister mınıstriniń orynbasary Han Song Rel habarlady.

«Biz zymyran synaǵyn apta, aı saıyn jáne jyl saıyn júrgizemiz», - dedi soltústikkoreılik sheneýnik. Ol eger AQSh Phenıanǵa qarsy «osynsha aqymaqtyqqa baryp, áskerı kúsh qoldanatyn bolsa», úlken soǵys bastalýy múmkin ekendigin eskertti.

Budan buryn 17 sáýirde BUU janyndaǵy KHDR turaqty ókili Kım In Ren AQSh óńirde qaýipti jaǵdaı qalyptastyryp otyrǵanyn, bul kez kelgen ýaqytta ıadrolyq soǵystyń bastalyp ketýine alyp kelýi múmkin ekenin atap ótken.